Францияда мамлакат ичида ҳаракатланишга нисбатан чекловлар узайтирилди

Францияда коронавирусга чалиниш билан боғлиқ 137 мингдан ортиқ ҳолат аниқланган, 15 мингга яқин киши вафот этган.

Фото: New York Times

Франция президенти Эммануэль Макрон коронавирус эпидемияси сабабли жорий этилган мамлакат ичида ҳаракатланишга нисбатан чекловларни 11 майгача узайтирди.

У бу ҳақда телевидение орқали халққа мурожаатида эълон қилди.

"Умид қайтмоқда, аммо Град-Эст ҳамда Иль-де-Франс регионида касалхоналар тўлиб кетган. Шу боис саъй-ҳаракатларимиз ва қоидаларни давом эттиришимиз шарт. Қатъий изоляция тартиби 11 май кунигача сақланиб туради", - деди Макрон.

У "келгуси тўрт ҳафта давомида ҳукумат томонидан жорий этилган чоралар сақланиб қолишини, кучайтирилмаслиги ва бўшаштирилмаслиги"ни айтди.

Коронавирус тарқалиши сабабли Франция ҳукумати қарори билан мамлакатда қаҳвахона, ресторан, кинотеатр ва ноозиқ-овқат дўконлари ёпилган. 17 мартдан аҳоли ҳаракатланишига нисбатан қатъий чекловлар ўрнатилган.

Охирги маълумотларга кўра, Францияда коронавирусга чалиниш билан боғлиқ 137 мингдан ортиқ ҳолат аниқланган, 15 мингга яқин киши вафот этган.