ОАВ: АҚШ давлат ва хусусий қарзи рекорд кўрсаткичга етади

АҚШ давлат қарзи ҳамда Америка корпорациялари қарзи янги коронавирус тарқалиши ортидан кескин ортади. Таҳлилчилар фикрига кўра, жорий йилда бу рақам рекорд даражага чиқади. Бу эса, пандемиядан сўнгги даврда иқтисодиёт учун хатарларни пайдо қилади. The Washington Post газетаси шундай хулосаларни эълон қилмоқда.

Нашрнинг ёзишича, 2020 йилда федерал бюджет харажатлари даромадлардан 4 трлн долларга ортиб кетади. Бундай рақамлар 1945 йилдан буён кузатилмаган. 

Хусусий сектордаги вазият ҳам худди шундай аҳволда. Сўнгги йилларда шундоғам кредитларга ишониб қолган кўплаб йирик корпорациялар инқироз даврида қарзлари миқдорини янада оширмоқда. Экспертлар фикрича, айни вақтда, бу компаниялар кредитларни тўламаслик ва ходимларини қисқартиришдан бирини танлаши керак бўлади. Шунга қарамай, нашрнинг қайд этишича, АҚШдаги ишсизлик даражаси Буюк турғунлик давридан буён кузатилмаган рақамларга етган.