Коронавирус сабабли 2020 йилда хорижлик туристлар Испанияда ҳордиқ чиқара олмайди

Коронавирус сабабли 2020 йил ёзда хорижлик туристлар Испанияда ҳордиқ чиқара олишмайди. Бу ҳақда ҳукумат ва туризм соҳаси вакилларига таяниб Испания ОАВ хабар берди.

Фото: Burak Akbulut

Испания меҳнат вазири Иоланда Диас 17 апрелда иқтисодий фаолиятни тиклаш бўйича ҳукумат режасида туризм соҳасининг хорижликларга очилиши йил охирига қадар кўзда тутилмаганини маълум қилди. Вазир соҳанинг ишсиз қолган вакилларига нафақа тўланишига ваъда берди.

Аввалроқ мамлакат вазирлар маҳкамаси вакиллари хорижликларга Испанияга ёзги сафарлар режалаштирмасликни тавсия қилганди.

"Қуёш ва пляж туризми" деб аталувчи туризм Испания иқтисодиётининг асосий соҳаси ҳисобланади. 2019 йилда мамлакатда 84 млн нафарга яқин хорижлик дам олган. Exceltur ташкилотининг маълумот беришича, келаётган ёзги мавсумда соҳадаги йўқотишлар камида 90 млрд еврони ташкил этади.

Шу билан бирга, Канар ороллари маъмурияти орол коронавирусдан унчалик жабр кўрмаганини инобатга олиб ёзда хорижликларни қабул қилишга рухсат сўради. Аммо Мадрид ҳозирча бу таклифга жавоб қайтармади.

Испанияда 20 апрель ҳолатига кўра, коронавирусга чалинганлар сони 200 мингдан ортиқ бўлиб, 21 мингга яқин киши вафот этган.

Тайёрлаган Дилшод Аскаров

#туризм #Испания #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.