ЖССТ коронавирус пандемияси ортида қизамиқ ва полиомиелит авж олиши хавфидан огоҳлантирди

Эмлаш хизматлари ишидаги узилишлар оқибатида инсоният қизамиқ ва полиомиелит каби юқумли касалликларга тўқнаш келиши мумкин. Бу ҳақда Жаҳон соғлиқни сақлаш ташкилотининг 24 апрелда бошланадиган Бутунжаҳон эмлаш ҳафталигига аталган баёнотида айтилган.

“Коронавирус пандемияси оқибатида эмлаш хизматлари ёпилиши хавфсиз ва самарали вакциналар ёрдамида олдини олиш мумкин бўлган бошқа касалликлар авж олиши билан хавф солади”, дейилган баёнотда. 

ЖССТда эмлаш хизматлари фавқулодда вазиятлар вақтида узилишлар билан ишлашни бошласа, қизамиқ ва полиомиелит каби касалликлар хавфи ошишини эслатиб ўтди. Бунга 2019 йилда Конго Демократик Республикасида қизамиқ авж олиши мисол бўла олади. Ўшанда ушбу касаллик 6 мингдан кўпроқ одамнинг ҳаётига зомин бўлган.

“Агар биз эмлашни ўтказмасак, бу касалликлар қайтади”, деб огоҳлантирмоқда ЖССТ раҳбари Тедрос Аданом Гебрейесус.

ЖССТнинг баҳолашича, коронавирус пандемиясигача “дунёда болалар эмланишини таъминлашда катта тараққиётга эришилган”. Жумладан, 2018 йилда 5 ёшгача бўлган болаларнинг 86 фоизи ичбуруғ, қоқшол ва кўкйўталдан эмланган. Ваҳоланки, 2000 йилда эмлаш билан қамранганлик 72 фоизни, 1980 йилда эса бор-йўғи 20 фоизни ташкил қилган. Бироқ ҳозирги эмлаш даражаси “юқоридаги касалликлар авж олишидан тўлиқ ҳимоя” учун зарур бўлган 95 фоизлик қамровга етмайди. 

Шу муносабат билан ЖССТ давлатларни коронавирус пандемияси шароитида “эмлаш хизматларини ҳимоялашга” ва бу хизматлар иши тўхтаб қолган жойларда шошилинч эмлаш дастурларини амалга оширишга чақирган.