Испанияда коронавирусга қарши курашдаги «илк ғалабадан сўнг» одамларга кўчага чиқишга рухсат беришмоқчи

Испанияда 2 майдан кўчада спорт билан шуғулланишга рухсат берилиши мумкин. Бу ҳақда мамлакат бош вазири Педро Санчес хабар берган. Испанияда кетма-кет икки кун касаллик аниқланганлар сони соғайганлар сонидан кам бўлди ва Санчес буни «коронавирус устидан қозонилган илк ғалаба», деб атади.

Фото: Reuters

23 апрель куни мамлакатда 2 796 кишида коронавирус аниқланди. Шу куни 3 105 киши тузалиб, касалхонадан чиққан. 24 апрель куни эса 2 944 кишида касаллик аниқланган бўлса, тузалганлар сони 3 353 нафарни ташкил қилди. Бу Испанияда касаллик ортга чекинаётганидан дарак беради деб баҳоланди.

«Сизга шуни маълум қилмоқчиманки, ўзгаришлар шу каби ижойиб давом этса, 2 майдан фуқароларга кўчада спорт билан шуғулланишга рухсат берилади. Шунингдек, бирга яшайдиган одамлар сайрга чиқишлари мумкин бўлади», деган мамлакат бош вазири Педро Санчес.

26 апрелдан мамлакатда қатор пляжлар олти ҳафталик танаффусдан сўнг очилиши кутилмоқда. Масалан, Коста дель Солда ота-оналар ўз фарзандлари билан боришлари мумкин бўлади. Марбелья ва Михас соҳилларида ҳам одамларга сайр қилишга рухсат берилади. Бу ҳақда Daily Mail хабар берган.

26 апрель 04:00 ҳолатига кўра, Испанияда коронавирус юқтирганлар сони 224 мингни ташкил этади ва мамлакат бу борада фақат АҚШдан ортда қолмоқда. Улардан 96 мингга яқини тузалган бўлса, 22 мингдан ортиқ испаниялик вирус сабаб ҳалок бўлган.

Мамлакатда кескин карантин чоралари жорий этилган ва одамлар ҳар куни 09:00дан 21:00гача бўлган вақт оралиғида фақат бир соат уйларидан 1 км узоқликда сайр қилишлари мумкин. 14 ёшгача бўлган болаларга эса катталарсиз кўчада юриш тақиқланган.

Тайёрлаган Ўткир Жалолхонов

#Испания #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.