Францияда коронавирусга чалиниш билан боғлиқ дастлабки ҳолат ўтган йил декабрда юз бергани маълум бўлди

Шифокор Ив Коэн декабрь-январь ойларида гриппга ўхшаган аломат билан касалхонага мурожаат қилган беморларнинг таҳлилларини текшириб кўришга қарор қилган. У 14 кишининг таҳлилини текширган, улардан биттасида коронавирус аниқланган.

Фото: AFP

Франциялик шифокор Ив Коэн мамлакатда коронавирусга чалиниш билан боғлиқ дастлабки ҳолат 2019 йил декабрда юз берганини маълум қилди, деб хабар берди "Би-би-си".

Бу энди аниқланди. Маълум бўлишича, Париж яқинида зотилжамдан даволанган бемордан 27 декабрда олинган таҳлил шу кунларда коронавирусга текширилди ва тест натижаси мусбат чиқди.

50 ёшли бу бемор аллақачон соғайган. Унинг сўзларига кўра, коронавирусга чалинганини хаёлига ҳам келтирмаган, чунки эпидемиологик нохуш вазият ҳукм сурган мамлакатларга бормаган.

Илгари Францияда коронавирусга чалиниш билан боғлиқ дастлабки учта ҳолат 24 январда қайд этилган деб ҳисобланиб келинаётганди. Улардан икки нафари Хитойнинг Уҳан шаҳридан келганлар, учинчиси эса уларнинг оила аъзоси бўлган.

Ив Коэннинг айтишича, у декабрь-январь ойларида гриппга ўхшаган аломат билан касалхонага мурожаат қилган беморларнинг таҳлилларини текшириб кўришга қарор қилган. У 14 кишининг таҳлилини текширган, улардан биттасида коронавирус аниқланган.

Жонс Ҳопкинс университети маълумотига кўра, Францияда коронавирус юқтирганлар сони 169,5 мингдан ошган, 25,2 мингдан ортиқ киши вафот этган.

Тайёрлаган Дилшод Аскаров

#Франция #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.