Янги Зеландия бош вазири янги карантин чекловлари сабабли кафега киритилмади

Ардерн ва унинг қаллиғи Кларк Гейфорд Веллингтондаги кафега киритилмаган, чунки янги карантин қоидаларига кўра, кафе тўла бўлган. Бу ҳақда New Zealand Herald нашри хабар берди. 

Янги карантин қоидаларига кўра, ресторанга ташриф буюрганлар бир-биридан маълум масофа сақлаган ҳолда ўтиришлари керак.

Гувоҳлардан бирининг твиттерда маълум қилишич, бош вазир Olive деб номланган кафега кирмоқчи бўлганда, унга кафе тўлгани сабабли рад жавоби берилган. Унинг қаллиғи бу хабарга “бу унинг айби билан бўлгани”, чунки олдиндан жой буюртириб қўймаганини маълум қилган. Унинг таъкидлашича, жой бўшагач, кафе ходимлари уларга етиб олиб, қайтишни таклиф қилишган.

Кафе эгаси буни тасдиқлаган. Унинг айтишича, бошқарувчи дастлаб жуфтликка рад жавоби берган, бироқ бир неча дақиқадан кейин жой бўшагач уларга қайтишни таклиф қилган. Унинг таъкидлашича, қоидалар ҳамма мижозларга бирдек тегишли. 

Янги Зеландияда 13 майдан коронавирус сабабли киритилган фавқулодда вазият режими бекор қилинган ва карантин чекловларининг 2-даражасига ўтилган. Бу даража 25 май куни қайта кўриб чиқилади. Ардерн аввалроқ маълум қилганидек, карантин чоралари енгиллаштирилишининг 2-даражаси доирасида чакана савдо қилувчи дўконлар, савдо марказлари, ресторанлар, кинотеатрлар ва бошқа жамоат жойлари очилади. Шунингдек, 18 майдан мактаблар ва университетлар ўз фаолиятини тиклайди. Мамлакат ичида ҳаракатланишга рухсат берилади, бироқ чегаралар хорижликлар учун ёпиқ қолади.