ЖССТ Британия рад этганига қарамай коронавирусга қарши гидроксихлорохин синовларини давом эттирмоқчи

«Бу – икки хил тадқиқот, биз ўз қўлланмаларимизга кўра ишимизни давом эттирамиз. Касалликка қарши курашдаги тадқиқотларга оид жаҳондаги барча очиқ маълумотларни қабул қиламиз. Жамоатчиликни натижалар билан таништиришда давом этамиз», – деди Сумья Сваминатан.

Гидроксихлорохин – безгакка қарши препарат бўлиб, ЖССТ томонидан маълум муддат коронавирусга қарши ҳам қўлланилган, май ойи охирига келиб эса бу амалиёт тўхтатилганди. Бунга сабаб – қатор олимларнинг бу дори воситаси коронавирусга қарши нафақат бефойдалиги, балки инсон организмига зарар келтириши мумкинлиги бўйича огоҳлантирувлари бўлганди.

Аммо 3 июнга келиб ЖССТ COVID-19 касаллигини даволашда яна бу дори қўлланилувчи тадқиқотларни давом эттира бошлади.

Март ойида АҚШ президенти Дональд Трамп гидроксихлорохин препаратини кенг қўллашни ёқлаб чиққан, ўзи ҳам профилактика мақсадида бу дорини мунтазам қабул қилишини айтганди.

Бундан олдинроқ ўз тадқиқотларини эълон қилган британиялик олимлар гидроксихлорохиннинг COVID-19 касаллигини даволашда самарасиз эканлиги бўйича хулосага келганликларини билдирганлар.

Тадқиқот олиб борган профессорлар Мартин Лендрей ва Питер Хорби 175та шифохонадаги 11 минг нафардан ортиқ бемор кузатиб, бу дорининг коронавирусга қарши бефойдалигини аниқлаганликларини маълум қилганлар.