Эрдўған Туркияда чеклов чоралари юмшатилганлигини эълон қилди

Туркия президенти Ражаб Тоййиб Эрдўған мамлакатда коронавирус эпидемияси сабабли киритилган чекловлар 10 июндан бошлаб юмшатилишини эълон қилди.

"Энди ресторан ва қаҳвахоналар ярим тунгача ишлаши мумкин (аввал соат 22гача эди). Ёши 65дан ошган фуқаролар соат 10дан 20гача уйларидан чиқа олишади. 18 ёшгача бўлган болалар катталар кузатуви остида ташқарига чиқишлари мумкин. Театр ва тўйхоналар 1 июлдан очилади", - деди Эрдўған.

Туркияда 1 июндан карантин чекловлари юмшатила бошланганди. Ҳукумат халқаро қатновларга қўйилган тақиқни бекор қилди, ресторан, бассейн, пляж, парк, спортзал ва болалар боғчалари очилди.

Туркия соғлиқни сақлаш вазири Фахреттин Кожанинг маълумот беришича, мамлакатда охирги суткада коронавирус юқтириш билан боғлиқ 989та ҳолат қайд этилган, жами касаллик юқтирганлар сони 171121 нафарга етган,  4711 киши вафот этган.

Аввалроқ Туркия транспорт ва инфраструктура вазири Одил Караисмаилоглу 10 июндан бошлаб 40та мамлакат, жумладан Ўзбекистон  билан авиақатновлар тикланишини маълум қилганди.