Италияда бош вазир сўроқ қилинади. У коронавирус пандемияси вақтида бепарволик қилишда айбланмоқда

Италиянинг коронавирусдан энг кўп зарар кўрган Бергамо шаҳрида бош вазир Жузеппе Конте сўроқ қилинади. Бунга Covid-19дан дан ҳалок бўлганларнинг қариндошлари ҳукуматни бепарволикда айблаб, тергов ўтказишни талаб қилишгани сабаб бўлди. Конте бундан қўрқадиган жойи йўқлигини айтди. 

Марҳумларнинг қариндошлари Бергамо ва коронавирус тарқалган бошқа йирик эпимарказларда, ҳукуматни кутиб ўтирмасдан карантин жорий этиш керак эди деб ҳисоблашмоқда.

Пайшанба куни шаҳар прокуратурасига коронавирусдан вафот этганларнинг қариндошларидан ташкил топган Noi Denunceremo жамоат ташкилоти томонидан 50 та шикоят келиб тушди.

Улар Ломбардиядаги Альцано-Ломбардо ва Нембро шаҳарларида коронавирус тарқалиши аниқлангандан сўнг дарҳол қизил ҳудудлар деб эълон қилиниши керак эди деб ҳисоблашмоқда.

Бу Италияда пандемия билан боғлиқ биринчи жамоавий даъводир. Ломбардияда мухолифатдаги “Шимол лигаси” партияси ҳокимият тепасида бўлиб, кўпчилик коронавирусга қарши курашни қониқарсиз ташкил этганликда марказий ҳукуматни эмас, ушбу партияни айбламоқда.

Прокуратура бош вазирдан ташқари, ички ишлар вазири Лучано Ламоржезе ва соғлиқни сақлаш вазири Роберто Сперанцани сўроқ қилади.

Прокурорлар уларни жиноий лоқайдликда айблаш учун асос бор-йўқлигини аниқлаш ниятида.

Eвропада коронавирус айнан Ломбардиядан тарқала бошлади, Италиядаги барча ўлимларнинг ярмидан кўпи ушбу ҳудудга тўғри келади.  

12 июнь ҳолатига кўра, Италияда эпидемия бошланганидан буён 236 мингдан ортиқ кишида Covid-19 аниқланган. Мамлакат ўлим даражаси бўйича дунёда тўртинчи ўринда (34,1 мингдан ортиқ ўлим).

Ким жавобгар?

Конте "Ўзим билган барча далилларни виждонан тақдим этаман. Ташвишланаётганим йўқ. Мен ҳар қандай суриштирувни маъқуллайман. Фуқаролар билиш ҳуқуқига эга, бизда эса жавоб бериш ҳуқуқи бор", деди.

Конте апрели ойида Би-би-си билан бўлган суҳбатда уни инқирозни етарлича баҳоламаганликда айблашларига қўшилмаслигини айтганди. Унинг сўзларига кўра, агарда касаллик юқтириш ҳақида илк марта маълум бўлганидаёқ карантин жорий этганида "уни телбага чиқаришган бўлишарди".

Унинг айтишича, Италия Уҳандаги каби кенг миқёсли карантинни жорий эта олмайди.

Ломбардия расмийлари карантин жорий этиш ҳукуматнинг ваколати бўлиши кераклигини таъкидламоқда. Ломбардия соғлиқни сақлаш вазири Жулио Галлеранинг сўзларига кўра, Альцано Ломбардо ва Немброда касаллик юқтириш ҳолатлари кўплиги 23 февралданоқ маълум бўлган.