Пекин коронавирус сабабли Хитойнинг қолган қисми билан транспорт алоқасини тўхтатади

Пекин маъмурияти 19 июндан Хитойнинг қолган ҳудудлари билан йўловчи ташишни тўхтатади. Бунга Хитой пойтахтида коронавирусга чалиниш ҳолатлари қайд этилгани сабаб ҳисобланади.

Фото: chinadaily

Транспорт алоқаси тўхтатилишини шаҳарнинг транспорт қўмитаси раиси Жун Цзюнь маълум қилган. Унинг таъкидлашича, коронавирус авж олиши ортида “йўловчилар оқими анча қисқарган”. У йўловчилар сотиб олинган чипталар учун пулларини қайтара олишларини қўшимча қилган.

Ўтган ҳафта Пекинда деярли 2 ойлик танаффусдан кейин яна коронавирусга чалиниш ҳолати қайд этилган. Айни вақтда шаҳарнинг шифохоналарида 159 киши коронавирусдан даволанмоқда. Шунингдек, Пекинда соғлиқни сақлаш соҳасидаги фавқулодда вазиятларга жавоб бериш даражаси иккинчидан учинчига оширилган.

Пекинда пандемия вақтида умумий ҳисобда 752 киши коронавирусга чалинган, улардан 584 нафари соғайиб кетган, 9 нафари вафот этган. Хитой бўйича коронавирусга чалинганлар сони 84,4 мингдан, ундан вафот этганлар эса 4,6 мингдан кўпроқни ташкил қилган, 79 минг киши соғайиб кетган.

Тайёрлаган Шуҳрат Раҳимов

#Пекин #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.