«Машарипов Испанияда ҳам ўйнаб кета олади» - Шота Арвеладзе «Пахтакор»нинг трансфер сиёсати, мақсадлари ва Суперлигадаги курашувчан 7 клуб ҳақида

- Ҳозирги пайтда барчанинг наздида Жалолиддин Машарипов «Пахтакор»нинг асосий юлдузи саналади. Айтингчи, миш-мишлар қаердан келиб чиқди?

- Қаердан келиб чиққанлигини билмайман.

- Келинг, унда бу қандай бўлганлигини айтиб бераман: мен Машарипов билан учрашганимда у бу ҳақда айтди. Кейин эса клуб спорт директори Жаъфар Ирисметовга қўнғироқ қилиб бу ҳақда сўрагандим.

- Сиз Жалолдан бу хабарнинг қаердан олганлигидан бошқа ҳамма нарсани сўрагансиз. Ҳаттоки Жаъфар ҳам бу хабарнинг манбаси эмас. Мен бу ҳақда эшитсам, энг аввало «буни ким айтди?» деб сўраган бўлардим. Мен ўзим фаолият олиб бораётган Осиё қитъасида Жалолиддинни айни дамдаги топ-3 футболчидан бири деб биламан. Европа клублари вакили билан гаплашганимда ҳам уларга Осиё бозорига яхшироқ эътибор қаратишлари кераклигини доим айтиб келаман. Тушунаман, Япония ва кореялик футболчилар жаҳон чемпионатлари орқали эътиборга тушишади. Аммо Қатар миллий жамоаси Осиё чемпионига айланган, Америка кубогида легионерлар билан қатнашган бўлса-да, қатарлик футболчиларнинг қайсидир клубга трансфер қилинганлигини эшитмадик, тўғрими? Одатда, мендан Жалол ёки ўзбек футболчилари ҳақида сўрашса, Ўзбекистонда иқтидорлар жуда кўплиги, улардан бири Элдор Шомуродов Россияда тўпурар эканлигини, Жалол ҳам бошқа лигаларда бемалол ўйнаб кета олишини айтаман.

Машариповнинг «Трабзонспор»га ўтиши ҳақидаги гаплар ҳам менинг Туркияда яхши обрў-эътиборга эга эканлигим ва Жалолиддин ҳақида кўпчиликка гапириб берганим ортидан пайдо бўлди. Ахир, Туркиядан туриб ҳеч ким ўз-ўзидан қўнғироқ қилиб, «Сизларда Машарипов бор экан, у қандай ўйинчи?» демайди-ку. Ўша ерда ҳам кимдир бу ҳақда газеталарда ўқиган, кимдир эса бошқалардан эшитган. Аслида эса Европадан Машариповга ҳали ҳеч қандай расмий таклиф бўлгани йўқ. Мен футболчимиз ҳақида турли давраларда турли мақтовларни билдиришим мумкин, Европадаги мураббийларга у ҳақда маълумот беришим мумкин, бўлди. Шу ерда менинг ролим тугайди. Клуб меники эмас, мен раҳбар ёки клуб президенти эмасман. Мен фақат ўз фикримни айтишим мумкин, холос. Ҳозиргача бу борада фақат битта таклиф тушган. «Трабзонспор» ҳақидаги гап-сўзлар ҳам туркларнинг Ўзбекистон чемпионатини кузата бошлаганидан, шу жумладан менинг натижаларим билан қизиқа бошлаганидан кейин пайдо бўлган. Кимдир мураббий қидирса, кимдир футболчи қидириб кузатиши мумкин.

- Сиз Машариповни қўйиб юборган бўлармидингиз?

- Йўқ. Мен уни қўйиб юбормайман. Биринчи навбатда, мураббий жамоанинг етакчи футболчиларидан бирини қўйиб юбормаслиги сюрприз эмас. Иккинчидан, клубнинг раҳбарлари, ҳомийлари бор. Фикримча, футболчи бундай пайтда клубнинг қарорини ҳурмат қилиши керак. Яъни, томонлар бир-бирини яхши тушуниши, футболчи яхши ўйнашда давом этиши, клуб эса очколарни ишлаб мақсади сари юриши керак. Чунки футболчиларга пулни раҳбарият беради, мен эмас. Шундай экан, бу масалани мен ҳал қилмайман.

- Тушунарли, демак сиз ҳал қилмайсиз. Бу борада шахсий фикрингиз қандай?

- Машариповни қўйиб юбориш керакми ёки йўқ - шу ҳақдами?

- У қачонгача ва қандай вазифалар учун сизга керак бўлади? Машариповни қачон қўйиб юборишингиз мумкин?

- Такрорлайман, «Пахтакор» доим максимал мақсадлар қўяди. Клуб Чемпионлар лигасида ҳам қатнашади. Мақсад вазифаларимиз учун Машарипов ўрнига тезда янги футболчи топа олмаймиз. Шу боис исталган мураббийдек мен камида мавсум якунигача, биз Жалолиддиннинг ўрнига футболчи топишимизга қадар уни клубда қолишини истайман. Бу ҳаммани қониқтирадими ёки йўқ, бундан қатъи назар. Бу борадаги молиявий масалаларни эса мен ҳал қилмайман. Бу менинг ваколатим доирасига кирмайди. Асосийси Жалолиддин жуда яхши ўйин намойиш этмоқда. Аммо у мана шу асосий вазифасини унутиб қўйиши керакмас. Қолаверса, ҳозир шундай вақтки, кимдир қаерга бориб қолса, оиласини йиллаб кўра олмай қолиши ҳеч гап эмас. Балки аэропорт ёпилиб қолар, ким билади дейсиз. Мана, куни кеча биз Жиззахда ўйнадик. Азиз Ғаниев ҳали ҳам Жиззахда экан. Ўзи ўйнаётган Дубайга уча олмаяпти. Ким биландир фақатгина шартнома имзолаш эмас, у ерга бориб, мослашиб ўйнаш ҳам жуда муҳим.

Яқинда Жалол билан гаплашганимда ҳам ўзига ҳам айтдим, кимдир сен билан қизиқаётган бўлса, бу шунчаки ажойиб хабар. Аммо унинг трансфер баҳоси кам эмаслиги мен учун сюрприз эмас, бироқ бу нарх унинг учун сюрприз бўлса, демак у ўзининг асл баҳосини билмайди. Балки уни ҳам тушуниш керакдир.

- Жалолиддин Машариповни яхши биладиган мутахассис, унинг мураббийи сифатида трансфер бозоридаги нархи қанча деб ўйлайсиз?

- Мен ҳеч қачон бирор футболчини сотиб олганим ҳам, сотганим ҳам йўқ. Таклиф энг аввало клубга тушади. Клубнинг бу борадаги позициясини ҳурмат қилиш керак. Аммо ҳозирда футбол ва футболчилар атрофида турли ваъдалар билан юрадиган агентлар кўп. Шу боис шошмаслик керак. Худо бундай имкониятларни ҳали яна беради. Жалолиддин ҳам айтайлик, икки йил аввалги даражасидан анча ўсди. Мисол учун, «Локомотив»да юрган Машарипов билан ҳозирги Машарипов ўртасидаги фарқ ҳар томонлама катта. Уни мендан яхшироқ билсангиз керак. У ўзгарди, ўсишга эриша олди. Умуман олганда, ўйин жиҳатидан Жалолга ҳам, Жамага (Жамшид Искандеров, муал.) ҳам доим айтиб келаман, футболчи шунчаки иқтидорли дея ном олиб қолиб кетмаслиги керак. 21 ёшда иқтидорли, 24, 28, фаолиятини қарийб тугатаётган 32 ёшда ҳам фақатгина иқтидорли футболчи номи билан қолиб кетмаслиги керак. Иқтидорни ҳаммага кўрсатиш лозим. Машарипов шунга яраша ўтган йил 48та ассистга муаллифлик қилди. Бу ажойиб натижа. У чинданам ўсди.

- Жалолиддин Европа даражасигача ўсдими?

- Масалан, жамоамиздаги исталган футболчи Европа жамоаларида ўйнаб кета олади.

- Масалан, Туркияда?

- Фақат Туркияда эмас, Испанияда ҳам ўйнаб кета олади. У ерда асосий нарса мослашиш, адаптация жараёни.

- «Пахтакор»нинг Осиё майдонларидаги мақсадларини ҳам инобатга олиб, айтинг-чи, клубнинг трансфер сиёсати қайси йўналишда бўлади?

- Трансфер сиёсатимиз ўзгаргани йўқ. Аввалги ишларимизни давом эттираяпмиз. Жамоада имконқадар ўзбекча руҳни яратаяпмиз.

- Қимматбаҳо трансферларни кутиш керак эмас, шундайми?

- Биз бошқа трансфер қила олмаймиз.

- Дердийўқ сўнггиси демак?

- Шундай.

- Дердийўқ қай даража мослашди, унинг ишлари қандай?

- Охирги икки ўйинда майдонга тушганди, кейин гол ҳам урганди. Орада яна пауза қилди. У қизли бўлди. Ўйлайманки, мослашиш жараёнида жамоадагилар унга ёрдам беришмоқда. Жамоамиз жуда ҳам аҳил, тил борасида ҳам ўхшашлик бор – турк тили ўзбек тилига жуда яқин. Бу борада унда ҳеч қандай муаммо йўқ.

- Таркибда етишиб чиқаётган ёш футболчилар ҳақида қандай фикрдасиз?

- Ўринбосарлар сафидан 5-6 нафар ёш футболчилар асосий жамоа билан шуғулланиб келишмоқда. Ижарадан қайтарган футболчиларимиз ҳам бор.

- Клуб олдига Осиё чемпионлар лигасида аниқ мақсад қўйилганми? Ушбу мавсум учун ўз олдингизга қандай вазифа қўйгансиз?

- Биласизми, бу ҳақда клуб раҳбарияти билан гаплашиб олгандик. Шу боис сизга биз учун асосийси иштирок десам, ёлғон гапирган бўламан. Ўтган йилги турнирдан кўриндики, биз лигада ҳам муносиб иштирок этишимиз мумкин. Бизгача ҳам ўзбек клублари яхши иштирок этиб, ярим финалларгача етиб борган, «Насаф» ОФК кубогида ғолиб бўлган. Мен ҳар доим журналистлар билан учрашувда ҳам айтаман, олдинги йиллардаги «Пахтакор» энг кучсизи бўлиб қолиши керак. Буёғига натижалар фақат яхшиланиб бориши шарт. Ўшанда клубнинг ўсаётганлигини кўриш мумкин бўлади. Яъни, ташкилотчилик бобида ҳам, футболчилар даражаси борасида ҳам фақат ўсишимиз керак. Шу боис айтишим мумкинки, биз ҳали мен истаган даражадан анча узоқдамиз. Шунга қарамай, клуб раҳбариятидан жуда миннатдорман. Чунки, улар нимани хоҳлаётганлигимни яхши ва тўғри тушунишмоқда. «Пахтакор» ҳеч қачон 4-5 йиллик ёки битта кутилмаган мағлубиятгача бўлган лойиҳа бўлиб қолмаслиги керак. Масалан, ўтган йили ОЧЛ сўнгги турида Саудияда ўйнадик. Бикмаев йиқилди, саудлар фейр-плэйга амал қилмай, 90+2-дақиқала гол уриб кетишди. Айтмоқчиманки, мана шунақа кутилмаган мағлубият бўлиб, қайсидир футболчининг йиқилиб қолгани ортидан бутун катта проект бузилмаслиги керак. Бунақада ҳаттоки «Ливерпуль» ҳам аввалги даражасига қайта олмасди. Ўтган мавсум ҳам муддатдан олдин чемпион бўлганимизда кўпчилик чемпионат қизиқ эмас, деб гапирди. Бунақада муддатдан олдин чемпионлик кузатилаётган Европадаги Англия, Германия чемпионатларини ҳам қизиқ эмас дейишимиз керакми? «Пахтакор» Ўзбекистонда барча даврларнинг энг яхши клуби. Яна мамлакатда юқори ўринлар учун кураш олиб бора оладиган 5та клуб бор - «Навбаҳор», «Локомотив», «Насаф», «Бунёдкор». Сўнгги йилларда яна «Сўғдиёна», ОКМК, «Металлург» сингари клублар ҳам курашга қўшилди.

- «Пахтакор» Осиё чемпионлар лигасида яримфиналгача бора оладиган даражага чиқдими?

- Менимча, савол нотўғри қўйилди.

- Шу ҳақда билишни истардим.

- Савол нотўғри қўйилдими, мен бундай саволга аниқ жавоб бера олмайман. Айтайлик, «Персиполис» шунча йил лигада ўйнаб, ютолмаган бўлса-ю, «Ас-Садд» ютган бўлса, демак нега биз бу ишни қила олмаслигимиз керак? Бу ерда иложсиз ишни кўрмаяпман. Асосий масала бутун сектор ҳали бу даражагача ўсгани йўқ. Бу йўлда ўзимиз-ўзимизга халақит бермасак, ҳеч ким бизга муаммо чиқара олмайди.

Суҳбатимиз якунида барчага соғлиқ, омад ва ҳозирда тарқалган касалликдан тезроқ қутулишимизни тилаб қоламан.

- Мазмунли суҳбат, яхши тилакларингиз учун сизга ҳам раҳмат айтиб қоламиз. Яхши кунларда кўришгунча!

Бобур Акмалов суҳбатлашди.