Исроилда коронавирусга чалиниш ҳолатлари кўпайганидан кейин баъзи ҳудудлар карантинга ёпилмоқда

Исроилда сўнгги суткада коронавирусга чалиниш бўйича 458 та янги ҳолат қайд этилди. Бу эса 22 апрелдан бери энг катта кунлик ўсиш ҳисобланади.

Фото: Getty Images

Haaretz нашрининг хабар беришича, коронавируснинг қайта авж олиши чекловлар юмшатилиб, мактаблар, корхоналар, ресторанлар, барлар ва сайёҳлик жойлари очилаётгани ортида кузатилмоқда.

Исроил ҳукумати коронавирусга чалиниш ҳолатлари кескин кўпайгандан кейин кириш-чиқишга чеклов киритиладиган бир нечта ҳудудни белгилади. Чекловлар 24 июндан жорий қилинади ва бир ҳафта давом этади. Жумладан, Элад шаҳри ва Тверия шаҳрининг бир қисмига кириш-чиқишга чеклов ўрнатилган.

Исроил бош вазири Биньямин Нетаняхунинг таъкидлашича, қолган ҳудудларда чекловлар киритилиши 24 июнда муҳокама қилинади.

Охирги маълумотларга кўра, Исроилда коронавирусга чалиниш ҳолатлари 21,5 мингдан кўпроқни ташкил қилмоқда, ундан 308 киши вафот этган.

Исроилда пандемия сабабли март бошидан киритилган чекловлар май ўртасидан секин-аста бекор қилиниб келмоқда.

#Исроил #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.