Шимолий Европа узра радиоактив булут сузмоқда, Россия ўзини бунга алоқадор санамаяпти

Жорий йилнинг 26 июнь куни Greenpeace ҳаракати Норвегия, Финляндия ва Швециядаги радиацион мониторинг кўрсаткичлари Шимолий Европа узра радиоактив моддалар миқдори ошганини кўрсатаётганини хабар қилган эди.

Июнь ойининг бошларида Россиянинг Кола ярим ороли чегарасидан узоқ бўлмаган ҳудудда ҳавода йод-131 топилгани таъкидланган. Кейинроқ Швеция ва Финляндия цезий-134, цезий-137, кобальт-60 ва рутений-103 топилганини қайд этган.

Россиядаги барча атом электр станцияларини бошқарувчи «Росэнергоатом» Европа чегарасига яқин икки АЭСдан ҳавога чиқарилаётган чиқиндилар июнь ойида рухсат этилган кўрсаткичдан ошмаганини таъкидлаган.

«Кола ва Ленинград АЭСларида ҳеч қандай ҳодиса рўй бермаган. Ҳар икки станция штатли режимда ишламоқда, ускуналарнинг ишига бирор эътироз йўқ», — деган РИА Новости’га концерн вакили.

Ғарблик экспертларнинг фикрича, радионуклидлар Россия томондан келмоқда. Уларнинг таркиби АЭС реакторнинг биринчи контурида ёки ёқилғи элементида нуқсон борлигини кўрсатади. Мутахассислар ўлчовларнинг чекланган сони туфайли манбанинг аниқ жойини кўрсата олишмаган. Боз устига, экспертлар изотоплар миқдори жуда кам эканлиги ва у атроф-муҳит ҳамда инсонлар саломатлигига таҳдид қилмаслигини айтишмоқда.

Жума куни Ядровий синовларни умумқамровли тақиқи тўғрисидаги шартнома бўйича ташкилот раҳбари Лассина Зербо Twitter’да 22-23 июнь кунлари топилган изотопларнинг тахминий манбаси мавжуд бўлган ҳудуд харитасини эълон қилган. Унга Болтиқ денгизи, Шимолий Европа мамлакатлари ва Россиянинг Санкт-Петербург шаҳри кирувчи ҳудуди киради. Ўзининг иккинчи хабарида Зербо изотоплар афтидан «фуқаролик манбаси»дан олинганини таъкидлаб ўтган.