Иорданияда хорижликларга карантинга риоя қилишларини кузатиш учун электрон билакузуклар тақиш жорий қилинди

Иорданияга келаётган хорижликлар 14 кун давомида ҳукумат томонидан белгиланган ва Ўлик денгиз бўйида жойлашган меҳмонхоналарда қолишлари керак бўлади. Иорданиянинг вирусларга қарши курашувчи мақсадли гуруҳи вакили Низор Обейдатнинг маълум қилишича, ушбу муддатдан кейин хорижликлар яна 14 кун уйда ёки бошқа меҳмонхонада мустақил яккаланишлари керак бўлади.

Иордания коронавирус тарқалишига қарши қатъий чоралар, жумладан комендантлик соати киритган эди. Бу мақсадда жумладан дронлар қўлланмоқда. Июнь бошида чекловлар қисман юмшатилган. Айни вақтда қиролликда коронавирусдан 1147 та касалланиш ҳолати ҳамда 10 та ўлим қайд этилган. Иордания соғлиқни сақлаш вазирлиги деярли ҳар кун иорданияликлар ва хорижликлар орасида янги касалланиш ҳолатлари қайд этилаётганини маълум қилмоқда. 

Таъкидлаш жоиз, пандемия вақтида бир нечта давлатларда коронавирус тарқалишининг олдини олиш мақсадида кузатув олиб борувчи электрон қурилмалар, жумладан махсус дастурларга уланган билакузуклар ва ақлли соатлар қўлланган. Мисол учун, Ҳонгконгда март ойидаёқ хориждан келувчи барчага карантинга риоя қилишларини назорат қилиш мақсадида электрон билакузуклар тақиш мажбурий қилинган. Шунингдек, Жанубий Корея, Хитой, Тайван ва Сингапурда ҳам коронавирус тарқалишига қарши бир қатор техник воситалар қўлланган.