Канье Уэст президентлик кампаниясини бошлади. Трамп уни қўллаб-қувватлади  

Уэст ўзининг сайловчиларни рўйхатга олиш офисига ташрифи кўрсатилган 1,5 дақиқалик видеони Twitter’да жойлаштирган.

“Мен барчага овоз бериш қанчалик осон эканини кўрсатмоқчиман”, деб айтган рэпер.

To vote click below https://t.co/LRJ8hC5rGi#2020VISION pic.twitter.com/MJOVGYYYvQ

— ye (@kanyewest) July 9, 2020

У видеода рўйхатдан ўтиш учун қўлланадиган анкета нималардан иборатлиги ҳақида сўзлаб берган. Унинг таъкидлашича, анкетада исм-шариф, туғилган сана, АҚШда шахсни тасдиқловчи стандарт ҳужжат сифатида қўлланувчи ҳайдовчилик гувоҳномаси, жинс, телефон рақами, манзил, сиёсий мансублиги ҳақидаги маълумотларни кўрсатиш керак.

Бундан ташқари, сайловчи қасамёдини имзолаш лозим. Видеода, шунингдек, рэпернинг офис ходими билан суҳбати акс этган. Уэст ходимдан нима учун кўплаб судланганлар овоз бера олмасликлари ҳақида сўрайди.

“Кўплаб одамлар бундайлар судланган жиноятчилар бўлгани учун овоз бера олмайдилар деб ўйлайдилар, бироқ улар ўз ҳуқуқлари қайтарилишини талаб қилишлари мумкин”, деб таъкидлаб ўтган рэпер суҳбатда.

Офис ишчиси буни ўзгартириш учун алоҳида штатлар даражасида тегишли қонунлар қабул қилиниши лозимлиги билан жавоб берган.

АҚШнинг амалдаги президенти Дональд Трамп Канье Уэстнинг сайловларда иштирок этиш қарорини маъқуллашини айтган. Трамп рэпер уни сайловларда қўллаб-қувватлашига ишонишини айтган.

“Менга унинг овози эшитилиши ёқади, у ҳар доим бизни қўллаб-қувватлаган ва ҳар доим қўллаб-қувватлайди, унинг рафиқаси ҳам [Ким Кардашьян] биз томон бўлади”, деб айтган Трамп Fox News телеканалига берган интервьюсида.

Трампнинг айтишича, Уэст бир қатор штатларда номзод сифатида рўйхатдан ўтиш учун кеч қолган ва бу муаммони ҳал қилишига тўғри келади.

“У яхши йигит, инсон, мен у билан яхши муносабатдаман ва фикримча, натижада у бизни қўллаб-қувватлайди”, деб айтган Трамп.

Уэст ва унинг рафиқаси аввал Трамп маъмурияти билан маҳбусларнинг реабилитацияси таклифлари бўйича ҳамкорлик қилган. Уэст ҳам ўшанда Трампни қўллаб-қувватлашини айтган.

Аввалроқ Уэст АҚШ президенти сайловларида мустақил номзод сифатида иштирок этмоқчилигини маълум қилган. Анъанага кўра, АҚШ президенти лавозимига икки етакчи партия – Республикачилар ва Демократлар партияси номзодларигина ғалаба қозонишга реал имкониятларга эга бўлади. Жорий сайловларда бу партиялардан Дональд Трамп ва Жо Байден иштирок этади.

Forbes нашри апрелда Уэстни миллиардер деб тан олганди. Унинг бойлиги 1,3 млрд долларга баҳоланган. Уэст АҚШнинг энг оммавий рэп ижрочиларидан бири ҳисобланиб, 20 дан кўпроқ Grammy мукофоти совриндори ҳисобланади.

АҚШда 59-президент сайловлари ўтказилиши 3 ноябрга белгиланган.