«Мен ҳеч нарса ваъда қилмайман, 25 йилдан бери ваъда бериб келаётганлар бор». Лукашенконинг рақиби давлат телевидениесида чиқиш қилди

Сайловда қатнашишдан маҳрум бўлган икки номзод - Виктор Бабарико ва Валерий Цепкалонинг штаблари Светлана Тихановскаяни қўллаб-қувватлашини билдирган.

Беларусь президентлигига номзоди қўйилган Светлана Тихановская 21 июль куни мамлакат телевидениеси орқали сайловолди дастури билан чиқиш қилди. У нима учун сайловда иштирок этмоқчи эканлиги, мамлакат муаммолар гирдобида қолганлиги ва халқ ваъдалардан чарчаганлигини айтди.

“Эрим Беларусь учун яхши ҳаётни истаганлиги сабабли тергов изоляторида ўтирибди. Ҳукумат одатдаги услуби бўйича ҳаракат қилди ва шу билан ҳаммаси тугайди деб ўйлади — аммо улар ҳаммаси энди бошланаётганлигини тушунишмади.

Ҳукумат Бабарико ва Цепкалони рўйхатга олмади, чунки уларни хатар деб билишади — аммо хатар уларда эмас, эзилиб яшашдан тўйган халқда. Эрим ҳукумат учун қулай ҳолатда ухлаб ётган беларусларни уйғотди”, деди у.

Тихановская халққа ҳеч қандай ваъда бермаслигини айтди.

“Мен ҳеч нарсани ваъда қилмайман, чунки бунинг учун бошқалар бор — улар сизларга 25 йилдан бери ваъда бериб келишяпти. Сизларга Лукашенкони жуда кам одам қўллаб-қувватлашини, милиция кўчада тинчгина айланиб юрганларни ушлаётганини, аҳолининг катта қисми қашшоқликда яшаётганини, коронавирусдан айтилаётганига нисбатан кўпроқ одам ўлаётганини, муқобил номзодларни қамаб қўйишганини телевизорда кўрсатишмаяпти.

Мен ҳокимият учун келмадим. Агар ғалаба қозонсам — ярим йил ичида барча номзодлар иштирокида янги ҳалол сайловлар ташкил этаман. Йигирма йил ичида биринчи марта биз ғалаба қозонишимиз учун етарли кучга эга бўлдик. Бизда иккита йўл бор  — ваъдаларни эшитишда давом этиш ёки янги Беларусни ўз қўлларимиз билан қуриш. Мен ўзимиз муносиб бўлган ҳаётни истайдиган ва қура оладиган оддий инсон, аёл ва онаман”, деди у.

Светлана Тихановская – таниқли сиёсий блогер Сергей Тихановскийнинг хотини. Тихановский президентликка номзодини кўрсатмоқчи бўлган, аммо май охирида ҳибсга олинган, марказий сайлов комиссияси унинг ҳужжатларини қабул қилмаганди.

Шундан сўнг уни қўллаб-қувватлаш учун Светлана Тихановская сайловда қатнашишга қарор қилди ва етарли имзо йиғишга муваффақ бўлди.

19 июль куни у фарзандлари мамлакатдан олиб чиқиб кетилгани ва хавфсиз жойда эканликларини айтди. Тихановская аввалроқ ўзини ҳибсга олиш, фарзандларини эса олиб қўйиш билан таҳдид қилинаётганини айтганди.

Якшанба куни Минскда Светлана Тихановскаянинг илк йирик митинги бўлиб ўтди. Унда сайловда қатнашишдан маҳрум бўлган икки номзод - Виктор Бабариконинг штаби раҳбари Мария Колесникова ва Валерий Цепкалонинг рафиқаси Вероника Цепкало иштирок этди. Ўтган ҳафта охирида Цепкало ва Бабариконинг штаби Тихановскаянинг номзодини қўллаб-қувватлашларини билдирганди.

Беларусда президентлик сайлови 9 августда бўлиб ўтади.