516 миллион сўмлик «вирус блокатор»ларнинг ноқонуний айланмасига чек қўйилди

Фото: Давлат божхона қўмитаси ахборот хизмати

Бугунги кунда республикада давом этаётган карантин ўз навбатида фуқароларимиздан уюшқоқлик ва ўрнатилган тартиб қоидаларга қатъий риоя этган ҳолда касалликка қарши курашишни талаб этади. Аммо синовли кунларда, айрим кимсалар томонидан сифати кафолатланмаган тиббиёт воситаларини юртимизга ноқонуний йўллар билан олиб киришга ва уларнинг ноқонуний савдоси билан шуғулланишга бўлган уринишларига қарши божхона органлари томонидан тизимли равишда кураш олиб борилмоқда.

Хусусан, Давлат божхона қўмитаси Контрабандага қарши курашиш ва божхона аудити бош бошқармаси томонидан Тошкент шаҳри Яшнобод туманида тиббиёт воситаларининг яширин айланмасига қарши тезкор тадбир ўтказилди.

Тадбир давомида фуқаро Ҳ.И. бошқарувидаги “Спарк” русумли автотранспорт воситасида йўловчи сифатида келган фуқаро У.И. шартли харидорга умумий қиймати 516,1 миллион сўмлик 3 970 дона хорижда ишлаб чиқарилган сифати кафолатланмаган “вирус блокаторлари”ни ноқонуний тарзда пуллаётган вақтида ашёвий далиллар билан қўлга олинди.

Ҳозирда юқоридаги ҳолат юзасидан божхона органлари томонидан суриштирув ҳаракатлари давом эттирилмоқда.

#божхона #вирус блокатор