Хориж фуқаролари Россияга коронавирус юқтирмаганлиги тўғрисидаги маълумотнома билан киритилади

Текширув ПЗР услубида, Россияга келишдан кўпи билан уч кун аввал ўтказилган бўлиши лозим.

Россияга келадиган хориж фуқаролари COVID-19га чалинмаганлиги тўғрисида маълумотномага эга бўлишлари шарт. Бу борада Россия давлат бош санитар шифокорининг тегишли қарори эълон қилинди.

Ҳужжатда қайд этилишича, бу қарор транзит билан ўтаётган хориж фуқаролари ва фуқаролиги бўлмаган шахсларга ҳам тааллуқли бўлиб, маълумотнома рус ёки инглиз тилида бўлиши керак.

Аниқлик киритилишича, текширув ПЗР услубида, Россияга келишдан кўпи билан уч кун аввал ўтказилган бўлиши лозим.

Аввалроқ Россия бош вазири Михаил Мишустин 1 августдан бошлаб халқаро авиарейслар қайта тикланишини маълум қилганди.

«Медуза»нинг ёзишича, ҳозирча ҳаво қатнови бор-йўғи уч мамлакат - Буюк Британия, Туркия ва Танзания билан келишилган. Туркиянинг Анқара ва Истанбул шаҳарларига мунтазам рейслар эса 1 августдан бошланади, 10 августдан курортларга - Анталия, Бодрум ва Даламанга парвоз қилиш мумкин. Буюк Британия билан боғлиқ ҳолатда парвозлар биринчи босқичда Лондонга бошланади.

Тайёрлаган Дилшод Аскаров

#Россия #хорижий фуқаро #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.