Nintendo’нинг соф даромади пандемия сабабли 541 фоизга ошди  

Видеоўйинлар ишлаб чиқариш билан шуғулланувчи Nintendo компанияси 2-чорак якунларига кўра 106,5 млрд иен (1 млрд доллар) соф даромад олганини маълум қилди. 

Бу қиймат япон компаниясининг бир йил аввалги кўрсаткичидан 541 фоиз кўпроқни ташкил қилган.
        
Компания тушуми 2-чоракда 3,38 млрд долларга (204 фоиз кўпроқ) етган. Тушумнинг икки карра ортишига коронавирус пандемияси ва турли давлатларда унга қарши киритилган чекловлар туртки бўлган. Компаниянинг энг талабгир ўйини “Animal Crossing: New Horizons” ўйини бўлиб қолмоқда. Мартда сотувга чиқарилган ўйиндан 22,4 млн нусха сотилган. Бу миқдордан 10,6 млни 2-чоракка тўғри келган. Ушбу кўрсаткич эвазига ўйин бутун тарих давомида энг кўп сотилган ўйинлар элликталигига кирди.

Бундан ташқари, компания пандемия сабабли бутловчи қисмлар етказилишидаги муаммога қарамай, ўзининг Switch ва Switch Portable ўйин консолларини муваффақиятли сотмоқда. 2-чорак давомида компания 5,68 млн.та ўйин консоли сотган.