«Катта хато»: Citigroup қарийб 1 млрд долларни Revlon кредиторларига адашиб ўтказиб юборди

Citigroup банкининг кредит операциялари бўлими ходимлари Revlon косметика компаниясига қарз берган компанияларга 900 млн долларни ўтказиб юборди. Банк кейинроқ буни «хато» деб эълон қилди ва ушбу пулларни қайтаришни талаб қилди, деб ёзади Bloomberg.

Қайд этилишича, косметика компанияси кредиторларининг ҳеч бири бу пулларни банкка қайтаришга тайёрлигини билдирмаган. 

Bloomberg бу ҳолатни «Уолл-стрит тарихидаги энг катта хатолардан бири» деб атади.

Агентликнинг ёзишича, Revlon компанияси ва унинг кредиторлари ўртасидаги низо кўп йиллардан буён давом этмоқда. Ушбу ҳафтада Brigade Capital Management, Symphony Asset Management ва HPS Investment Partners косметика компаниясини 2016 йилда берилган кредит бўйича судга берди. Шартнома кўра, Revlon қарзларини 2023 йилда қайтариши керак эди. Аммо даъвогарларнинг таъкидлашича, компания кредит олиш учун гаров сифатида қўйилган интеллектуал мулк ҳуқуқини таъминот сифатида қўйиб, янги кредит олган. 

Шу боис ундан қарзларини зудлик билан қайтариш талаб қилинганди. Кутилмаганда Citigroup хатоси билан қарз тўлиғича қайтарилди. Шуниси қизиқки, банкнинг ўзи ҳам ушбу даъво бўйича жавобгар ҳисобланади, чунки у қарз бўйича маъмурий агент сифатида иштирок этган.

Манбаларнинг сўзларига кўра, Brigade, Symphony ва HPS банк хатоси билан ўтказилган пулларни қайтаришдан бош тортяпти.

Citigroup ушбу ҳолат бўйича ички суриштирув бошлаган.