Давид Сильва «Реал Сосьедад»га ўтди

«Манчестер Сити» билан шартномасини узайтирмай, жамоадан кетган Давид Сильва Ла Лигага қайтди. Жаҳон чемпиони фаолиятини Сан-Себастьяннинг «Реал Сосьедад» жамоасида давом эттиради. Бу ҳақда клуб расмий саҳифаларида эълон қилинди.

Маълум бўлишича, «Реал Сосьедад» Сильва билан 2022 йил 30 июнга қадар шартнома имзолаган. У янги жамоасида ҳам «Манчестер Сити»да бўлгани каби 21-рақамда ҳаракат қилади.

Сильва 2010 йил «Валенсия»дан «Манчестер Сити»га ўтганди. У 10 йил давомида шаҳарликлар билан 4 марта Англия чемпиони бўлди. Шунингдек, 2 марта Англия Кубоги, 3 марта Англия суперкубоги ва 5 марта Лига Кубогини қўлга киритган. Сильва Испания миллий жамоаси сафида икки марта Европа чемпионати ва бир марта жаҳон чемпионатида ғолиб бўлган.