Хитойда ҳашаротлар асосида ишлаб чиқилган вакцинанинг клиник синовлари бошланади

Хитойда коронавирусга қарши ҳашаротлар ҳужайралари асосида ишлаб чиқилган вакцинанинг одамларда клиник синовлари бошланади. Бундай қарорни Хитойнинг тиббий маҳсулотлар бўйича давлат бошқармаси қабул қилган.

Фото: NP

Сичуань университети лабораториясида ишлаб чиқилган вакцина маймунлар ва бошқа ҳайвонларда муваффақиятли синовдан ўтказиб бўлинган.

Университет мутахассисларининг таъкидлашича, вакцина устида ишлар бир неча ой давомида олиб борилган ва улар ҳанузгача бирор-бир яққол иккиламчи таъсир келтириб чиқармаган юқори сифатли вакцина олишга муваффақ бўлишган.

Маълум қилинишича, ушбу воситадан йилига 100 млн дона ишлаб чиқарилади.

Аввалроқ Хитойнинг Sinopharm фармацевтик корпорацияси коронавирусга қарши вакцинасини декабрдан сота бошлашни режалаштираётганини эълон қилган. Ушбу вакцинанинг икки инъекцияси 50 долларга яқин туради.

Компания мутахассисларининг таъкидлашича, ушбу вакцинанинг бир донаси билан эмланганларда коронавирусга қарши 97 фоиз иммунитет ҳосил бўлади. Иккинчи эмлашдан кейин эса бу кўрсаткич 100 фоизга етади. Sinopharm вакцинадан йилига 220 млн тўплам ишлаб чиқаришни мўлжалламоқда.

Тайёрлаган Шуҳрат Раҳимов

#вакцина #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.