«Ҳадемай яна совуқ кунлар бошланади, биз дардимизни кимга айтайлик?» – Яккабоғдаги қишлоқ муаммолари

Мурожаатда айтилган ҳолатларни ўрганиш мақсадида Яккабоғ тумани Хонимқўрғон қишлоғида бўлдик.

Қишлоқ аҳлининг айтишича, бу ерлар эски ва янги чекларга бўлинган; мурожаат эса янги чек ерларида яшаб келаётган фуқаролар томонидан йўлланган.

Хонимқўрғон, шунингдек, қўшни Болғали қишлоғи билан узвий боғланган. Бу икки қишлоқ учун ёши 60га яқинлашган «бобо трансформатор» хизмат қилиб келмоқда. Кенгайгандан кенгаяётган қишлоқлар учун эса биргина трансформатор кучи камлик қилиши табиий, албатта.

«Дардимизни кимга айтайлик?»

Юқорида таъкидлаганимиздек, қишлоқнинг бу қисми янги чек ерлари бўлиб, яқин 10-12 йилдан бери аҳолига турар жой сифатида бериб келинган. Фуқароларнинг маълум қилишича, ёғин-сочинли кунларда лойга беланадиган қишлоқ йўллари фойдаланишга яроқсиз ҳолга келиб қолади. «Катталар-ку майли, ёш болалар мактабга боришда жуда қийналади», дейди қишлоқ аҳли.

«Бу ерларда уй қуриб яшай бошлаганимиздаёқ ўзимиз симёғочлар топиб, калта-култа симлар топиб улаб электр токи ўтказганмиз, тўловларни доимий тарзда тўлаб келамиз.

Биз трансформатор ва кўчага тош ётқизиш масаласи бўйича туман ҳокимлигига жорий йил қиш ойларида ариза билан чиққан эдик. Афсус, шунча ойдан бери муаммо ҳал бўлмади. Иккала масала бўйича ҳам «бугун бўлади, эрта бўлади», деб турли хил важлар кўрсатилиб, муаммо ҳал этилмаяпти. Ҳадемай яна совуқ кунлар бошланади, биз дардимизни кимга айтайлик?

Сим узилса, нозиклигидан симёғочга чиқиб бўлмайди. Электр таъмирлаш корхонаси ходимлари симни улаб бериши учун нарвонлар олиб келамиз. Симлардаги уланган жойларнинг-ку ҳисобида адашиб кетасиз», – дейди қишлоқ фаолларидан бири Анвар Холиёров.

Муаммо йил охиригача ҳал этилиши ваъда қилинган

Муаммо юзасидан туман ҳокимлиги, туман электр тармоқлари корхонасига бир неча бор мурожаат қилинган, аммо амалий натижа бўлмаган. 2020 йил 25 февралда Яккабоғ туман ҳокимига қишлоқ учун алоҳида трансформатор ўрнатиб берилишини, қишлоқнинг ички йўлларига қум-шағал тўкиб таъмирланишида амалий ёрдам беришини сўраб қилган мурожаати туман тегишли ташкилотлари томонидан ўрганилган.

Яккабоғ ТЭТК томонидан берилган муносабатда Хонимқўрғон қишлоғи аҳолиси ўсиб бораётгани сабабли трансформатор қуввати етмаётгани аниқлангани ва 2020 йил режасига киритилгани маълум қилинган.

Туман ободонлаштириш бошқармаси бошлиғи С.Суюнов эса Хонимқўрғон қишлоғи ички йўллари 2021 йил давлат дастурига киритилиб, пул маблағи билан молиялаштирилгандан сўнг жорий таъмирланишини маълум қилган. Суюновнинг жавоб хатида ушбу жавоб қаноатлантирмаса, юқори турувчи органларга мурожаат қилиши мумкинлиги айтилган.

Шундан сўнг қишлоқ фуқароси Анвар Холиёров президент виртуал қабулхонасига мазкур икки муаммо бўйича мурожаат йўллаган. Вилоят ҳокими ўринбосари С.Азизовнинг 2020 йил 1 апрелда бу мурожаат юзасидан юборган хатида қишлоқ ички йўллари Яккабоғ туман ҳокимлигининг 2020 йил қўшимча бюджет маблағлари ҳисобидан қум-шағал аралашмаси билан таъмирлаб берилиши, трансформатор ҳам жорий йил якуни билан бартараф этилиши айтилган.

Аммо мана куз кириб келяптики, ишлар бошланишидан дарак йўқ. Биз Яккабоғ туман ҳокимлиги матбуот хизмати билан боғланиб, бу борада муносабат билдиришларини сўрадик, ҳозирча жавоб бўлмади.

«Электр муаммоларига ечим топилса, йўлларимизга шағал тўкиб беришса бўлди»

Қишлоқда эканмиз, икки симёғоч орасидаги сим ўн жойидан уланганини кўрдик.

«Қишлоғимиз учун янги трансформатор, симёғоч ва сим тортиб берилса, йўлларимизга шағал тўкиб беришса бўлди. Бошқа муаммомиз йўқ», – дейди қишлоқ аҳли.

«Қиш кунлари кўчамизда юриб бўлмайди, болалар кўчага чиқолмайди. Мактабга бориши учун асфальт йўлгача этик кийиб чиқариб қўямиз, қайтаётганда яна шу... Электр токига бирон қимматроқ аскунани қўшишга қўрқамиз, сабаби ток мунтазам эмас, тинимсиз ўчиб-ёниб туради. Ҳозирдан қиш учун тайёргарлик кўрмасак ҳар йилги аҳвол бошимизга тушади», дейди улар.

Айтишларича, ҳозирда узатилаётган электр токи фақат бир нечтагина маиший техникани ишлатишга, кечаси уйни хира ёруғ қилишгагина етади, холос. Шу омонат ток ҳам куз ойларидан бошлаб узилишларга учрайди ва қишда қишлоқ электр таъминотисиз қолади.

Яккабоғдаги қишлоқ муаммосига дахлдор мутасадди ташкилотлар ва раҳбарлар масалага бефарқ бўлмайдилар, деб умид қиламиз.

Йигитали Маҳмудов,
Kun.uz мухбири