Хитойда Россиядан келтирилган денгиз маҳсулотлари қадоғида коронавирус аниқланди

Қадоқда вируснинг мавжудлиги Чанчундаги касалликларни назорат ва профилактика қилиш марказида ўтказилган текширувда яна бир марта тасдиқланган.

Фото: Anthony Kwan / Getty Images

Хитойда Россиядан импорт қилинган музлатилган кальмар қадоғида коронавирус аниқланди. Бу ҳақда «Синьхуа» агентлиги хабар берди.

Хабарда айтилишича, Чанчунь шаҳрида коронавируснинг нуклеин кислотасига ўтказилган мунтазам текширув вақтида натижа мусбат чиққан.

Агентликнинг ёзишича, худди ўша денгиз маҳсулотларининг 10 килоси Фуюй шаҳрига жўнатилган бўлган. Ушбу кальмарларни сотиб олганлардан коронавирусга тест топшириш сўралган.

Август ойида Reuters агентлиги Эквадордан Хитойнинг Аньхой провинциясига келтирилган креветкалар қадоғида вирус зарралари аниқлангани ҳақида хабар берганди. Худди шундай ҳолат Шаньдун провинциясида ҳам қайд этилган.

Тайёрлаган Дилшод Аскаров

#Хитой #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.