Москвада иш берувчилар ходимларнинг учдан бир қисмини масофадан туриб ишлашга ўтказади

Россия пойтахти Москвада 5 октябрдан бошлаб масофадан туриб ишлашга ўтиш мажбурий бўлади. Бу ҳақда шаҳар мэри Сергей Собяниннинг блогида хабар қилинди.

Собяниннинг тегишли фармонига биноан, иш берувчилар камида 30 фоиз ходимларни масофадан туриб ишлашга ўтказишлари шарт.

Шунингдек, 65 ёшдан ошган ва сурункали касалликларга чалинганларнинг ҳаммасини масофадан ишлашга ўтказиш зарур. «Иш жойида мавжудлиги ташкилот фаолияти учун жуда муҳим бўлганлар»га истисно қилиниши мумкин.

Масофадан туриб ишлашга ўтиш талаби мудофаа корхоналари, «Росатом», «Роскосмос» корхоналари ва ушбу корхоналар фаолиятини қўллаб-қувватловчи «электрон техник саноат» компанияларига тааллуқли эмас.