Британия суди Николас Мадурога Венесуэла олтинини қайтариб олиш имконини берди

Британия ҳукумати Венесуэла мухолифати етакчиси Хуан Гуайдони Венесуэла президенти деб тан олгач, ушбу олтин тақдири аросатда қолган. Англия банки Венесуэла ушбу олтинни коронавирусга қарши курашга ишлатмоқчилигини айтса-да, АҚШ босими остида олтинни расмий Каракасга қайтаришдан бош тортган. Шундан кейин Венесуэла БМТга ушбу можарода воситачи бўлишни илтимос қилиб мурожаат қилган ва май ойида олтинни БМТнинг Озиқ-овқат дастурига ўтказиш талаби билан судга даъво аризаси топширган. Дастлаб Лондон олий суди ушбу шикоятни қондиришдан бош тортган.

Бироқ эндиликда Англия ҳакамлик суди Венесуэланинг амалдаги президенти Николас Мадуро ҳисобланиши ҳақида қарор чиқарди. Гуайдонинг эса президент деб тан олиниши ҳақидаги аввалги қарор “мужмал” деб топилган, чунки Британия ҳукуматида ҳеч ким қироллик Мадурони тан олмаслигини очиқчасига бирор марта айтмаган ва демак, ушбу олтинни бошқариш ҳуқуқи Мадурога тегишли ҳисобланади. 

Англия банкида Венесуэланинг умумий оғирлиги 31 тонна келадиган олтини сақланади. Каракас бир неча марта олтиннинг бир қисмини қайтаришга уринган, бироқ банкнинг рад жавобини олган. Жумладан, Англия банки 2018 йилда Мадуро давлатга тегишли олтинни эгаллаб олиб, ўз манфаати йўлида ишлатиши мумкинлиги хавотирида Венесуэлага 420 млн фунт стерлинглик олтинни қайтаришни рад этган.