Оқ уй ходимлари орасида коронавирус жадал тарқалмоқда

Оқ уй ходимлари орасида коронавирус жадал тарқалмоқда. Айни вақтда АҚШ маъмуриятининг юқори лавозимли мансабдор шахслари ва улар билан мулоқотда бўлган шахсларда 34 та касалланиш ҳолати қайд этилган.

АВС телеканалининг Фавқулодда вазиятларда бошқарув бўйича федерал агентлигининг (FEMA) ички ҳужжатига таяниб хабар беришича, Оқ уйда инфекцияга чалинганлар телеканал аввалроқ ҳисоблаб чиққандан кўра кўпроқни ташкил қилади. Таъкидланишича, Оқ уйда 24 киши коронавирусга чалинган. Жумладан, улар орасида АҚШ президенти Дональд Трамп, унинг рафиқаси Мелания, Трампнинг матбуот котиби, сайловолди штаби директори, ёрдамчилари Хоуп Хикс ва Стивен Миллер, Республикачилар партияси миллий қўмитаси раҳбари бор.

Телеканалнинг таъкидлашича, янги маълумотлар Оқ уйдаги инқирознинг ўсиши ва ҳукумат амалдорлари коронавирус тарқалиши ҳақидаги маълумотни яширишга уринганларидан дарак беради.

Трампнинг коронавирусга учрагани 2 октябрда маълум бўлган. У шифохонада 3 кун даволанган ва ҳозирда Оқ уйда тикланишни давом эттирмоқда.