Измирдаги зилзиладан 4 кун ўтиб вайроналар остидан 3 ёшли қизча тирик топилди

Измир вилояти губернатори Салим Қошғарнинг маълум қилишича, Айда Гезгин исмли 3 ёшли қизча қутқариб олинган. Қизча вайроналар орасидан чиқариб олинган 109-киши бўлди.

Қизчанинг қутқарилишида иштирок этган қутқарувчилардан бири Нусрат Аксойнинг таъкидлашича, у қизча овозини эшитиб, бу ҳақда бошқа қутқарувчиларга маълум қилган. 

“Дастлаб мен қизча овозини эшитдим ва бу ҳақда бошқаларга хабар қилдим. Қизчага етиб борганимда, унинг исмини ва қўлини силкита оладими-йўқми сўрадим. Қизча қўлини кўтариб, уни силкитди”, деб айтган қутқарувчи.

Аниқланишича, Айда зилзила вақтида уйининг ошхонасида бўлган ва кир ювиш машинаси ҳамда идиш ювиш машинаси орасидаги бўшлиқда қолиб кетган. Қизча жиддий жароҳатлар олмаган. Кейинроқ қутқарувчилардан бири қизча шифохонага олиб кетилаётганда ундан нимани хоҳлаётганини сўраганда, у сув ва айрон ичишни истаётганини айтган. 

Шифокорларнинг таъкидлашича, қизчанинг аҳволи қониқарли. Кейинроқ қизчанинг онаси ўлик ҳолда топилган.

Айданинг амакиси оила аъзолари бир дақиқа ҳам умидни йўқотмаганларини айтган. “Кўриб турганингиздек, мўъжизалар юз беради. Биз олдин ҳам зилзилаларни бошдан ўтказганмиз. Биз барчамиз дуодамиз ва қутқарувчилар ҳамда шифокорларга миннатдорлик билдирамиз”, деб айтган қизчанинг амакиси Анил Жондон. 

Айданинг қутқарилиши видеоси бутун дунёга тарқалди ва кўпчилик буни ҳақиқий мўъжиза деб атади.

2 ноябрда ҳам вайроналар остидан икки бола чиқариб олинганди. Улардан бири 3 ёшли Элиф Паринчак зилзиладан 65 соат ўтиб топилган. Бундан аввалроқ эса 14 ёшли Идил Ширин қутқарилганди.

Айни вақтда Измирдаги қутқарув ишларига 8 мингга яқин киши ҳамда 25та хизмат ити жалб қилинган.