Италияда 2019 йилда олинган қон намуналарида коронавирусга қарши антитаналар топилди

Аввалроқ Барселона университети олимлари шаҳарнинг 2019 йил март ойидаги оқава сувлари намуналаридан SARS-CoV-2 коронавирусини топишгани хабар қилинганди.

Фото: AP

Италияда Sars-Cov-2 коронавируси 2019 йил сентябрдаёқ тарқалгани маълум бўлди: ўша пайтда олинган қон намуналарида антитаналар аниқланди.

“Биз 2019 йил сентябр ва 2020 йил март оралиғида ўпкаси скрининг қилинган 959 кишидан олинган қон намуналарида таҳлил ўтказдик ва антитаналарни ўрганиб чиқдик. Қон намунаси олинган 959 кишининг 111 нафарида Sars-Cov-2 RBD антитаналари аниқланди (11,6 фоиз)”, – дейилади Милан онкология институти ва Сиена университети ҳисоботида.

Тадқиқот энг кўп ҳолатлар Ломбардия, Пьемонт, Лацио, Эмилия-Романя, Тоскана ва Венетода учраганини кўрсатди. Бу эса COVID-19 ҳолатлари Италияда “биринчи бемор” қайд этилишидан анча аввал юз берганини билдиради.

Миландаги “Луижи Сакко” юқумли касалликлар клиникаси директори Массимо Гали эса вируснинг 2019 йил сентябрда пайдо бўлганига шубҳа билдирди. Унинг фикрича, ўша пайтдаёқ касалланиш ўчоқлари пайдо бўлиши керак эди.

Расмий маълумотларга кўра, янги коронавирус 2019 йил декабрда Хитойнинг Уҳан шаҳридан тарқалган.

Тайёрлаган Дилшод Аскаров

#Италия #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.