ЕИ етакчилари Туркия мавзусини муҳокама қилади

ЕИ етакчиларининг 10 декабрда бўлиб ўтадиган саммити кун тартибидан Туркия мавзуси ҳам ўрин олган. Бу ҳақда Германия канцлери Ангела Меркел ЕИга аъзо мамлакатлар вакиллари билан ўтказилган видеоконференцияда маълум қилди.

«Албатта, биз воқеалар ривожини кузатишимиз, шундан сўнг қарор чиқаришимиз лозим. Ҳозирча фақат бир нарсани айтишим мумкин, ҳаммаси биз хоҳлагандек кетмаяпти»,- деди у.

Меркел шунингдек, Венгрия ва Польшанинг ЕИ бюджети ва коронавирус пандемиясининг иқтисодий оқибатларига қарши курашиш бўйича дастурга нисбатан қўйган ветосига ҳам тўхталиб ўтди.

 «Бу ҳал қилиш керак бўлган жуда жиддий муаммо»,- деди Германия канцлери.

Аввалроқ ЕИ Кенгаши Туркиянинг Ўрта ер дангизида бурғулаш ишларини олиб борганига жавобан киритилган санкцияларни 2021 йил 12 ноябргача узайтирганди.

 Брюсселнинг эслатишича, Шарқий Ўрта ер денгизида ноқонуний бурғулаш ишларини олиб боришга қарши санкциялар киритилиши ЕИ Кенгашининг 2019 йил 14 октябрдаги хулосасига асосланган.

 Туркия ЕИнинг бу позицияни инкор қилиб келмоқда. Анқара Греция ўзининг алоҳида иқтисодий ҳудуди деб ҳисоблайдиган сувларда нефть-газ разведкасини олиб бормоқда. Кипр ҳам Туркияга нисбатан эътироз билан чиққан.