Италия кубоги. Шомуродовдан голли ассист, «Женоа»дан «Генуя дербиси»да иродали ғалаба

Италия кубоги 1/16 финали доирасидаги «Сампдория» - «Женоа» учрашувида Элдор Шомуродов тўп сураётган жамоа меҳмонда иродали ғалабага эришди.

Ўйинни асосий таркибда бошлаган ўзбекистонлик ҳужумчи дастлабки дақиқалардан жамоаси сафида анча фаол ҳаракат қилди. Шунга қарамай, ўйиндаги ҳисоб мезбонлар футболчиси Верре томонидан очилди – 1:0.

Иккинчи бўлимда ҳужумкорликни оширган «Женоа» 60-дақиқада Элдор Шомуродовнинг ажойиб ҳаракати эвазига ўйинда бурилиш ясай олди. Катта тезликда ҳужумга ўтган ўзбекистонлик форвард икки ҳимоячини ортда қолдириб, деярли яккама-якка вазиятга чиқиб борди ва тўпни бўш дарвоза қаршисида турган шериги Скамаккага ошириб, голли узатмага муаллифлик қилди – 1:1.

Голдан руҳланган меҳмонлар кейинги 10 дақиқаликда яна иккита гол киритишди – 68-дақиқада Лерагер, 72-дақиқада эса Скамакка дублга эришиб, «Женоа» «Генуя дербиси»да камбекни амалга оширган ҳолда кейинги босқичга йўлланма олди – 1:3.

Шу куни «Женоа» таркибидаги ҳозирча энг яхши ўйинни ўтказиб, голли ассист муаллифига айланган Элдор Шомуродов 85-дақиқада майдонни тарк этди. Унинг ўрнига Марко Пьяцца майдонга тушди.

Италия кубоги. 1/16 финал
Сампдория – Женоа 1:3
Голлар: 1:0 – 18 Верре, 1:1 – 60 Скамакка, 1:2 – 68 Лерагер, 1:3 – 72 Скамакка.

Сампдория – Аудеро, Тонелли (Кандрева, 87), Ауджелло, Берешиньски, Йосида, Адриен Силва (Экдаль, 78), Торсбю, Янкто, Верре, ла Гумина (Габбьядини, 87), Лерис (Дамсгор, 77).
Женоа – Маркетти, Бани (Масьелло, 79), Гильоне, Гольданига, Пеллегрини, Ровелла (Мелегони, 46), Стураро (Лерагер, 65), Зайц (Бадель, 46), Сапата, Шомуродов (Пьяца, 85), Скамакка.