Байден товламачилик қилмаганлигини исботлаган тақдирдагина Оқ уйга президент сифатида кира олади – Трамп

 Демократ Жозеф Байден агарда унинг сайловдаги эҳтимолий ғалабаси товламачилик эмаслигини исботлай олсагина АҚШ президенти бўла олади. Мамлакатнинг амалдаги президенти Доналд Трамп ўзининг “Твиттер”даги саҳифасида ана шундай изоҳ қолдирди.

“Байден ўзининг кулгили “80 млн овози”ни ноқонуний ёки товламачилик йўли билан қўлга киритмаганини исботлаган тақдирдагина Оқ уйга президент сифатида кириши мумкин”, – деб ёзди Трамп.

“Агар Детройт, Атланта, Филадельфия ва Милуокида нималар юз берганини кўрсангиз – сайловлардаги кенг миқёсли алдов – у (Байден) ҳал қилиб бўлмайдиган муаммога дуч келган”, – деб қўшимча қилган АҚШ президенти.

Ушбу пост эълон қилинганидан бир оз ўтиб, “Твиттер” Трампнинг қайдига баҳсли таъкид сифатида белги қўйди.

Аввалроқ Жо Байден АҚШдаги президент сайловларида 80 миллиондан кўпроқ овоз тўплаган тарихдаги биринчи номзод бўлгани хабар қилинганди.