АҚШ Сомалидан қўшинларини олиб чиқиб кетишини эълон қилди

АҚШ президенти Доналд Трамп Сомалидан Американинг деярли барча ҳарбийларини олиб чиқиб кетиш тўғрисида қарор қабул қилди. Бу ҳақда Пентагон матбуот хизмати хабар берди.

“АҚШ президенти мудофаа вазирлиги ва АҚШнинг Африкадаги қўмондонлигига 2021 йил бошида Сомалидаги ҳарбий хизматчиларнинг катта қисмини бошқа мамлакатларга кўчиришга буйруқ берди”, – дейилади хабарда.

 Пентагоннинг билдиришича, бу АҚШ Африкадаги ҳарбий салоҳиятини сусайтиришини англатмайди.

“Бу ҳарбийларнинг бир қисми Африка шарқини тарк этишини билдиради. Аммо қолган кучлар Сомалига қўшни мамлакатларга жойлаштирилади ва улар Сомали ҳудудида операциялар ўтказишга шай ҳолатда туради”, – дея қайд этади Пентагон.

 The Wall Street Journal газетасининг ёзишича, Сомалида 700 нафарга яқин америкалик ҳарбий бор. Нашрнинг қайд этишича, уларнинг бир қисми Кения ва Жибутидаги базаларга кўчирилади.