Британияда коронавирусга қарши эмлаш бошланмоқда

Сешанба куни Британия коронавирусга қарши оммавий эмлашни бошлаган биринчи ғарб мамлакати бўлади.

Фото: AFP

Ҳукумат томонидан аниқланган 10та хавф гуруҳи вакиллари биринчи бўлиб эмланади. Бу 80 ёшдан ошганлар, қариялар уйи беморлари, шунингдек, тиббиёт ва ижтимоий ходимлар, деб хабар бермоқда ВВС.

Жами 40 миллион дозада вакцина буюртма қилинган. 800 мингга яқин вакцинанинг биринчи партияси ишлаб чиқарилаётган Бельгиядан Буюк Британияга етказиб берилди.

Вакцина 21 кунлик оралиқда қилинадиган иккита инъекциядан иборат. Баҳорга қадар хавф гуруҳларини эмлаш режалаштирилган, май ойидан бошлаб эса эмлаш кенг аҳоли учун мавжуд бўлади.

Буюк Британия бош вазири Борис Жонсон бу жараён тез юз бермаслигини айтиб, чекловлар ва гигиена қоидаларига риоя қилишни давом эттиришга чақирди.

Барча эмланганларга вакцинация тўғрисида гувоҳнома берилади. У исм ва фамилия, шунингдек, биринчи ва иккинчи инъекцияларни қабул қилиш санаси кўрсатилган кичик карта бўлади.

Бир ҳафта олдин Британия ҳукумати дунёда биринчи бўлиб АҚШнинг Pfizer ва Германиянинг BioNTech ширкатлари томонидан биргаликда ишлаб чиқариладиган вакцинани маъқуллади.

Бошқа иккита вакцина - АҚШнинг Moderna ва Британиянинг AstraZeneca’си ҳали ҳам текширувчи идоралар томонидан кўриб чиқилмоқда.

Тайёрлаган Отабек Матназаров

#Британия #вакцина #коронавирус

2019 йилнинг декабрь ойи охирида Хитойнинг Ухань шаҳрида номаълум вирус тарқала бошлади. Бу вирус ҳаво орқали одамдан одамга юқади ва ўлимга олиб келади.