«Ўздавкарантин» «Россельхознадзор» киритган тақиққа муносабат билдирди. Ўзбекистонда ToBRFV вируси аниқланмаган

Инспекция ахборотига кўра, текширувлар натижасида Ўзбекистон ҳудудида помидорнинг жигарранг буришиш (ToBRFV) вируси аниқланмаган.

Ҳозирги кунда республика ҳудудига помидор ва калампир маҳсулотларининг уруғлари олиб кирилиши тўлиқ чекланган. Мазкур уруғликларни экспорт қилувчи давлатлар билан музокаралар олиб борилмоқда.

26 ноябр куни Россия ветеринария ва фитосанитария назорати бўйича федерал хизмати («Россельхознадзор») ToBRFV вируснии важ сифатида келтириб, Фарғонадан Россияга помидор ва қалампир маҳсулотлари келтиришни тақиқлаган эди.

7 декабрга келиб, «Россельхознадзор» Фарғона вилоятидан импорт қилинадиган барча ўсимлик маҳсулотларига тақиқ киритди. Бунга 1 тонна қуритилган ўрикда личинка шаклидаги 2та капр қўнғизи топилгани сабаблиги айтилди.

«Ўздавкарантин»нинг 13 декабрдаги ахборотида, капр кўнғизи профилактикаси мақсадида фитосанитар назорат кучайтирилгани, барча омборларни зарарсизлантириш ишлари ўтказилаётгани маълум қилинган.

Инспекция россиялик расмийлар билан музокара ўтказиш орқали чекловларни бекор қилиш чоралари кўрилаётганини билдирган.

Эслатиб ўтамиз, «Россельхознадзор» помидорнинг жигарранг буришиш вирусини сабаб сифатида кўрсатган ҳолда Навоий ва Қашқадарё вилоятларидан ҳам қалампир ва помидор импортини тўхтатиб қўйган.

Олий Мажлис депутати, «Юксалиш» умуммиллий ҳаракати раиси Бобур Бекмуродовнинг фикрича, бундай ҳаракатлар Жаҳон савдо ташкилотига аъзоликни тезлаштириш лозимлигини яна бир бор эслатмоқда.

Ўсимликлар карантини давлат инспекцияси ўз баёнотида «Россельхознадзор» киритган вақтинчалик тақиқлар «асосланмаган хавотирлар»ни келтириб чиқараётгани қайд этилган.

«Бугунги кунда «Ўздавкарантин» ва «Россельхознадзор» карантин хизматлари ўртасида муносабатларида кенг қамровли хамкорлик барча йўналишлари бўйича фаол ўзаро ривожланиб келмоқда. Бунга мисол – жорий йилдаги коронавирус пандемиясига карамай, «Ўздавкарантин» мурожаатига кўра «Россельхознадзор» кўшимча равишда 3 омборни вақтинчалик сақлаш омборлар рўйҳатига кўшди ҳамда икки давлатнинг фитосанитария соҳасидаги ахборот тизимлари муваффақиятли интеграциялаштирилди», – дейилади инспекция баёнотида.

Помидорнинг жигарранг бужмайиш вируси – янги ва жуда кам ўрганилган вирус бўлиб, 2020 йил сентябр ойига келибгина Европа ва Ўрта ер денгизи ўсимликлар карантини ва ҳимояси ташкилотининг А2 рўйхатига кўшилган.

Ушбу касаллик уруғлар, вирус теккан асбоблар, кийимлар, механик воситалар орқали ва экинларнинг чангланиши вақтида тарқалиши мумкин. Ҳозирча бу вирусга чидамли помидор навлари ишлаб чиқилмаган.

Фарғона вилоятида мавжуд иссиқхоналарнинг 99,11 гектар майдонини помидор экинлари ташкил этиб, уларнинг барчаси саноат иссиқхоналари ҳисобланади. Шундан 36,46 гектарни ташкил этган 18 та иссиқхонада помидор етиштириш давом этмоқда.