Озарбойжон Россия билан чегарасини ёпди

Озарбойжон ҳукумати коронавирус пандемияси сабабли Россия билан чегара 2021 йилнинг 1 мартигача ёпилганини эълон қилди. 

 Мамлакатнинг Россиядаги элчихонаси хабар қилишича, «Россияда ҳам, Озарбойжонда ҳам коронавирус юқтирганлар сонининг кескин ўсиши» ҳамда мамлакатда қатъий карантин чоралари киритилгани сабабли Боку тегишли чораларни кўрган.

 Озарбойжоннинг Россия билан қуруқликдаги чегараси Доғистон Республикаси ва Ҳачмаз тумани ўртасида ўтган. Озарбойжоннинг Россиядаги элчихонаси фуқаролардан Доғистонга сафар қилмасликни сўраган.

Аввалроқ Озарбойжон мунтазам авиақатновлар учун ҳаво чегараларини 31 январгача ёпганди. Республикада 14 декабрдан 18 январгача қатъий карантин режими жорий этилган: барча ресторан, қаҳвахона ва савдо марказлари ёпилган, аҳоли фақат махсус SMS-рухсатнома билангина уйдан чиқиши мумкин.

Охирги маълумотларга кўра, Озарбойжонда 195,4 мингдан ортиқ киши коронавирус юқтирган, 2,1 мингдан ортиқ бемор вафот этган. Россияда эса 2,7 млн ҳолат қайд этилган, 49,7 минг киши вафот этган.