Еврокомиссия Fiat Chrysler ва Peugeot автокомпанияларининг бирлашишини маъқуллади

Европа иттифоқи Италия ва АҚШнинг Fiat Chrysler Automobiles NV (FCA) ҳамда Франциянинг PSA Group автомобил компаниялари бирлашишини маъқуллади. Компаниялар бирлашуви натижасида дунёда йириклиги бўйича 4-рақамли автокомпания ҳосил бўлади.

Фото: Getty Images

Peugeot, Citroen, DS, Opel ва Vauxhall брендлари остида автомобиллар ишлаб чиқарувчи PSA компанияси FCA билан бирлашиш ҳақидаги келишувни 2019 йил декабрда имзолаган. 2020 йил июнида Еврокомиссия PSA ва FCA бирлашуви натижасида Европанинг енгил автомобиллар бозорида рақобатнинг сезиларли камайиши мумкинлигидан хавотирланиб, бирлашув ҳақидаги келишувни синчков текширишни бошлаган.

Келишувнинг маъқулланиши PSA ва FCA акциядорларининг ушбу келишув бўйича овоз беришига имкон беради. Компания акциядорлари 4 январда бу масала бўйича йиғилиш ўтказишади. Уларга янги компания ташкил этилишини маъқуллаш таклиф этилади. PSA ва FCA бирлашуви натижасида ҳосил бўладиган янги компания Stellantis деб аталади.

Компанияларнинг қўшма баёнотида улар Еврокомиссиянинг қарорини қутлашлари айтилган. Келишув 2021 йилнинг 1-чораги охиригача ёпилиши кутилмоқда.