АҚШ ва Исроил БМТнинг 2021 йилги бюджетига қарши чиқди

Бундан ташқари, АҚШ Дурбан декларациясига бағишланган тадбирнинг молиялаштирилишига ҳам қаршилик билдирди. АҚШнинг фикрича, ушбу ҳужжат Исроилга қарши тусга эга.

Фото: Spencer Platt /Getty Images

АҚШ БМТнинг 2021 йил учун қабул қилинадиган бюджетига қарши овоз берди. Бу ҳақда Bloomberg агентлиги хабар қилди.

Агентликнинг маълумот беришича, 3,2 млрд доллар миқдоридаги бюджетга Исроил ҳам қарши чиққан.

"Қўшма Штатлар БМТ Эронга қарши илгари бекор қилинган санкциялар тикланмаганидан чуқур афсусда", - дейилади АҚШнинг БМТдаги доимий вакили Келли Крафтнинг баёнотида.

Бундан ташқари, Америка томони 2001 йилда Дурбанда (ЖАР) ирқчиликка қарши кураш бўйича бутунжаҳон анжуманида қабул қилинган Дурбан декларациясига бағишланган тадбирнинг молиялаштирилишига қарши чиқди.

АҚШнинг фикрича, ушбу ҳужжат Исроилга қарши тусга эга.

2020 йил 20 августда АҚШ давлат котиби Майкл Помпео БМТ Хавфсизлик кенгашига АҚШ Эронга нисбатан санкцияларни тиклаш ниятида эканлиги тўғрисидаги билдиришномани топширганди. Кейинроқ Помпео Хавфсизлик кенгашининг бошқа аъзолари қаршилигига қарамасдан, чеклов чоралари 20 сентябрдан кучга киришини маълум қилди. АҚШ ва Доминикандан ташқари Эрон билан ядровий келишувнинг барча қатнашчилари, Хавфсизлик кенгашидаги барча мамлакатлар бу қарорга қарши чиққан.