Испанияда бир базм сабабли бутун мамлакат бўйлаб карантин кучайтирилди

Испания ҳукумати коронавирус пандемияси сабабли киритилган чекловларни карантин қоидаларига зид равишда 40 соатдан кўпроқ давом этган биргина базм туфайли кучайтирди. 

The Local нашрининг хабар беришича, Барселонадан 30 км узоқликда жойлашган Линарс-дел-Валес аҳоли пунктида 300 киши Янги йилни нишонлаш мақсадида омборда йиғилган.   

Карантин қоидабузарларини тарқатиш учун воқеа жойига махсус кучларнинг юзлаб ходимлари келган. Полиция маълумотларига кўра, базм вақтида қўлланган қурилмалар мусодара қилинган, базм ташкилотчилари ҳибсга олинган, унинг иштирокчилари эса жавобгарликка тортилади.

Жумладан, базм иштирокчиларига 3 минг еврогача, ташкилотчиларига эса 600 минг еврогача жарима солиниши мумкин.

Базмдан кейин ҳукумат кўплаб ҳудудлар учун, жумладан, одамларнинг ҳаракатланишига нисбатан қатъийроқ чекловлар киритилишини эълон қилган. Янги қоидаларга кўра, аҳоли ўз уйини иш ёки шифокор ҳузурига бориш учунгина тарк эта олади.

Охирги маълумотларга кўра, Испанияда касалланиш ҳолатлари 1,9 млндан, ўлим ҳолатлари эса 50 мингдан ошиб кетди. Мамлакат касалланиш ҳолатлари сони бўйича дунёда 9-ўринни эгалламоқда.