Ургутдаги пойабзал ишлаб чиқарувчи оилавий корхонада йирик ёнғин содир бўлди

Бугун, 11 январ куни, соат 11:24ларда Самарқанд вилояти Ургут тумани “Мерганча” МФЙда жойлашган “Тойибахон Нур" пойабзал ишлаб чиқарувчи оилавий корхонасида ёнғин содир бўлган.

Фото: ФВВ матбуот хизмати

Фавқулодда вазиятлар вазирлиги томонидан эълон қилинган маълумотда айтилишича, ёнғин оқибатида бинонинг тахминан 250 квадрат метр майдонига зарар етган.

Мазкур ҳолат юзасидан вилоят Фавқулодда вазиятлар бошқармасининг 4та ёнғин-қутқарув экипажи воқеа жойига етиб борган. Қутқарувчиларнинг олиб борган саъй-ҳаракатлари натижасида ёнғин соат 11:40да ўраб олиниб, 13:35да тўлиқ бартараф этилган. Шунингдек, ёнғиндан корхонанинг 150 квадрат метр майдони сақлаб қолинган.

Ушбу ҳолатдан жабрланган ва ҳалок бўлганлар йўқ. Ҳодисанинг келиб чиқиш сабаби ва зарари аниқланмоқда, дейилади хабарда.