YouTube Трампнинг каналини блоклаб қўйди

YouTube видеохостинги мутахассислари АҚШ президенти Доналд Трампнинг каналидан "зўравонликка даъват қилган видеоёзув"ни ўчириб ташлади. Хабар қилинишича, эндиликда каналга янги роликлар жойлаштириш вақтинчалик тақиқланди.

Айнан қайси видеоёзув ўчириб ташланганлигига аниқлик киритилмаган. Янги роликлар жойлаштиришга қўйилган тақиқ етти кун амал қилади. Сервис вакилининг сўзларига кўра, тақиқ узайтирилиши мумкин.

Бундан ташқари, каналда изоҳ қолдириш имконияти ҳам чекланди. Компаниянинг билдиришича, изоҳларда зўравонликка даъват қилиш эҳтимоли бўлиши мумкин.

Шу вақтга қадар YouTube Трампга нисбатан чеклов киритмаган ягона йирик интернет-платформа бўлиб турганди.

Капитолийга ҳужум уюштирилганидан сўнг  Facebook ва Twitter АҚШ президентининг аккаунтларини вақтинчалик блоклаб қўйганди. Кейинроқ Трампнинг Facebook ва Instagram’даги аккаунтларига қўйилган тақиқ номаълум муддатга узайтирилди. Трампнинг Twitter аккаунти эса бутунлай блокланди.