Ватикан Ўзбекистондаги янги элчисини тайинлади

Ватикан матбуот хизматининг хабарномасига кўра, Пестум архиепископи Жованни д'Аниелло Ўзбекистондаги янги апостол нунцийси (Ватикан элчиси) этиб тайинланди, деб хабар бермоқда “Дунё” ахборот агентлиги мухбири.

Рим папаси Францискнинг қарорига кўра, 66 ёшли дипломат бир вақтнинг ўзида Россия ва Ўзбекистонда Ватикан манфаатларини билдиради.

Жованни д'Аниелло 1955 йил 5 январ куни Италияда туғилган. Ўрта мактаб ва гимназияни тугатгач, Салерно шаҳридаги Минтақалараро семинария ва Кампано Папа семинариясида фалсафа ва илоҳиёт йўналишларида таълим олган. У Римдаги Папа Латеран университети ва Муқаддас Фома Папа университетида каноник ҳуқуқни ўрганган, каноник ҳуқуқ доктори илмий унвонига сазовор бўлган.

Бундан аввалроқ дипломат Ватиканнинг Бразилия, Камбожа ва Таиланддаги элчиси лавозимларида ишлаган, Конго, Лаос ва Мянмада фаолият юритган.

Жованни д'Аниелло Челестино Милоре ўрнига тайинланди. Ч.Милоре эса Ватиканнинг Франциядаги элчиси сифатида фаолиятини давом эттирмоқда.