Афғонистон президенти АҚШ "Толибон" билан тузилган келишувни қайтадан кўриб чиқаётганини маълум қилди

Ашраф Ғанининг сўзларига кўра, Вашингтон вакиллари "ушбу шартномани ҳисобга олган ҳолда қўшма йўл харитаси ишлаб чиқиш учун Кобул билан маслаҳатлашувлар ўтказади".

Фото: AP

АҚШнинг янги маъмурияти Вашингтон ва "Толибон" ҳаракати ўртасида тузилган келишувни қайтадан кўриб чиқмоқда. TOLOnews телеканалининг хабар беришича, бу ҳақда Афғонистон президенти Ашраф Ғани маълум қилди.

Унинг сўзларига кўра, Қўшма Штатлар "толиблар билан келишувни шошилинч тартибда қайта кўриб чиқмоқда".

Ғанининг қўшимча қилишича, шундан сўнг Вашингтон вакиллари "ушбу шартномани ҳисобга олган ҳолда қўшма йўл харитаси ишлаб чиқиш учун Кобул билан маслаҳатлашувлар ўтказади".

Афғонистон президентининг фикрича, Оқ уйга президент Жо Байден келиши билан "Кобул ва Вашингтон муносабатларида янги саҳифа очилди".