Boeing 2020 йилни рекорд миқдордаги зарар билан якунлади

АҚШнинг Boeing корпорациясининг тушуми 2020 йилда 24 фоизга қисқариб, 58,2 млрд долларни, кўрган соф зарари эса 11,9 млрд долларни ташкил қилди.

Фото: Boeing

Бундай маълумотлар Boeing’нинг 2020 йил 4-чораги ва бутун йил учун берган молиявий ҳисоботида келтирилган.

Бундан ташқари, компания янги модели 777X’нинг етказилиши бошланиши навбатдаги марта кўчирилишини маълум қилди. Ушбу моделнинг серияли ишлаб чиқарилиши аввал бир неча марта кўчирилган: дастлаб уни 2020 йилда ишлаб чиқариш режалаштирилган, бироқ энди гап 2023 йил охири ҳақида бормоқда.

Компаниянинг ўтган йил самолётлар етказиб бериш ҳажми 59 фоизга қисқариб, 157та самолётни ташкил қилган. Boeing, шунингдек, 2020 йилда 18,4 млрд доллар сарфлаган.

Компания акциялари нархи ҳисобот эълон қилингандан кейин 4 фоизга тушиб кетди.

Boeing’нинг муаммолари 2019 йилда 737 Max самолётларидан фойдаланиш икки авиаҳалокатдан кейин тўхтатилгач бошланди. Сўнгра бу муаммоларга пандемиянинг авиация соҳасига салбий таъсири қўшилган. Ҳозирда 737 Max самолётлари эксплуатацияси унга тегишли ўзгартиришлар киритилгани туфайли тикланмоқда.