Президент: Битта вилоят ҳокими ва битта вазирни шу ҳафта ишдан оламан

Ўзбекистонда вилоят ҳокимларидан бири ва вазирлардан бири ишдан бўшатилиши кутилмоқда. Бу ҳақда президент Шавкат Мирзиёев 27 январь кунги селекторда маълум қилди.

«Битта вилоят ҳокими, битта вазирни бу ҳафта ишдан оламан. Ноинсофлиги учун ишдан оламан. Аравани тортмагани учун. Эшитасизлар ҳали», – деди давлат раҳбари.

Kun.uz мухбири хабарига кўра, Мирзиёев ишдан олинадиганлар ўрнига ёш кадрлар тайинланишини қўшимча қилган.

«Бош вазирга ўнта вазирни ишдан олишимиз керак деганман. Иккитаси ишдан олинди, лекин бу ҳали етарли эмас», – таъкидлади у.

Эслатиб ўтамиз, 2021 йил январида коммунал хизматлар вазири ва олий таълим вазири ўзгарган эди.

#Шавкат Мирзиёев