ХТВ ноҳақликка дуч келган ўқитувчилардан 1006 рақамига мурожаат қилишни сўради

Халқ таълими вазири ўринбосари Темур Комилов 1 февраль кунги матбуот анжуманида Ўзбекистон Маърифатпарварлар жамияти учун ўқитувчилар ойлигидан ушлаб қолиниши қанчалик тўғри экани ҳақидаги саволга жавоб берди.

Фото: Shutterstock

«Турли жамиятлар учун тўловлар, бадаллар, ажратмалар ходимнинг ёзма розилигисиз ёки мажбурий тарзда ушлаб қолиниши мумкин эмас», – дея Комиловнинг сўзларини келтирмоқда Kun.uz мухбири.

Вазир ўринбосари халқ таълими тизимидаги ходимларга иш ҳақидан ёзма розиликсиз ёки мажбурий ушлаб қолишлар, умуман, халқ таълими тизимидаги ходимларга қилинган ноҳақликлар кузатилганда, 1006 ёки +998999881006 рақамлари ёхуд www.ustozovozi.uzedu.uz портали орқали виртуал инспекторга мурожаат қилишларини сўради.

Темур Комиловнинг айтишича, Халқ таълими вазирлигининг президент қарори билан ташкил этилган назорат-ҳуқуқий хизмати шу каби ишлар билан шуғулланади.

Матбуот анжуманида ХТВ расмийси 2024 йилгача мактаб ўқитувчилари маошини 1000 долларга етказиш мўлжал қилинганини ҳам таъкидлади.