Шаҳрихондаги «алвастикўприк»: Президент топшириғидан кейин маҳалладаги муаммолар ҳал этиляпти

Kun.uz бундан бир ой олдин Шаҳрихон туманидаги Файзиобод маҳалласини қийнаб келаётган яроқсиз кўприк, ҳудуддаги ичимлик суви ва электр таъминотидаги камчиликлар ёритилган мақола эълон қилган эди.

Видеомақола эълон қилингач, маҳалладаги муаммоларга президент Шавкат Мирзиёев ҳам эътибор қаратиб, селекторлардан бирида Андижон вилояти ҳокимидан изоҳ сўради.

Давлат раҳбарининг топшириқларидан сўнг муаммолар қандай ҳал этилаётганини ўрганиш мақсадида биз яна Шаҳрихонга йўл олдик.

Айни пайтда ҳудуддаги эски алвасти кўприк ўрнига пиёдаларга вақтинча фойдаланиш учун янги кўприк қурилибди. Асосийси, Шаҳрихонсой устига замонавий, узунлиги 32, эни 6,5 метр бўлган, транспорт воситалари ҳам ўтишига мўлжалланган кўприк қурилиши бошланган.

Лойиҳа қиймати – 4,5 миллиард сўм.

Маълум бўлишича, бир ой ичида маҳаллага 1 километрдан зиёд янги электр тармоғи тортилган. 25 та симёғоч ўрнатилиб, трансформатор янгиланган.

Бундан ташқари, барча кўча ва уйларга ичимлик суви тортилиб, сув қудуғи ва минораси янгиланиб, сув муаммоси ҳам бартараф этилган.

«Kun.uz сайтидан маҳалламизга келиб, ҳолатни ўрганишган эди. Мана, бир ойга қолиб-қолмасдан кўприк қурилди, симёғочлар ўрнатилди, уйларга сув келди, бундан маҳалламиз аҳли жуда хурсанд. Мана, янги замонавий кўприк қуриляпти. Туман ҳокимлиги томонидан вақтинчалик бўлса ҳам мана бу кўприк қуриб берилди.

Аҳоли шу кўприкдан ўтиб, бола-чақа жуда хурсанд. Муҳтарам президентимизнинг назари тушиб, миллиард-миллиард сўм пулга битадиган катта замонавий кўприк қурдириб беряпти. Енгил машина ҳам, юк машинаси ҳам ўтадиган ҳолатда бўляпти. Тез ва жадал бўляпти бу ишлар», – дейди маҳалла оқсоқоли Абдуманноб ота Исмонов.

«Андижон сув таъминоти» МЧЖ Шаҳрихон туман филиали бошлиғи Валижон Муллажоновнинг маълум қилишича, «Қўрғонча» МФЙга қарашли Файзиобод кўчаси аҳолисини тўлиқ ичимлик суви билан таъминлаш учун «Турон тонги» МЧЖ билан биргаликда 1,5 км сув тармоғи тортилиб, янги қудуқ ишга туширилган.

Файзиободда электр таъминоти бўйича муаммолар бартараф этилган. 25 дона бетон таянчлар ўрнатилиб, 1,2 км янги тармоқ тортилибди.

«Маҳалламизда янги кўприк қуриляпти, тўлиқ электр тармоқлари тортилди, бундан маҳалла хурсанд. Мана, сув тармоқлари тортилди, ҳамма хонадонда сув чиқяпти... Мана шу қилинган эзгу ишларнинг барчаси муҳтарам президентимиз Шавкат Миромонович Мирзиёевнинг эътиборидан сўнг бошланди. Биз маҳалла аҳлимиз билан президентимизга жуда катта миннатдорчилик билдирамиз. Вилоят ҳокимига ҳам, туман ҳокимига ҳам миннатдорчилик билдирамиз», – дейди «Қўрғонча» МФЙ раиси Азизахон Раҳимова.

Элмурод Эрматов,
Жаҳонгир Маҳмудов