Россия ва Франция бир-бирларининг дипломатларини яширинча чиқариб юборган – ОАВ

Маълумот берилишича, Россиянинг Франциядаги элчихонаси иқтисодий хизмати ходимларидан бири «жосуслик қилаётганида қўлга олинган». У кейинроқ мамлакатдан чиқариб юборилган.

Фото: AFP

Париж ва Москва махфий равишда бир-бирларининг дипломатларини чиқариб юборган, деб хабар берди Les Echos нашри ўз манбаларига таяниб.

Нашрнинг маълумот беришича, Россиянинг Франциядаги элчихонаси иқтисодий хизмати ходимларидан бири «жосуслик қилаётганида қўлга олинган». У кейинроқ мамлакатдан чиқариб юборилган.

Россия жавоб тариқасида Франциянинг Россиядаги элчихонаси иқтисодиёт бўлими ходимларидан бирини чиқариб юборган, деб ёзади Les Echos.

Франция охирги марта россиялик дипломатларни 2018 йил мартда ГРУ собиқ полковниги Сергей Скрипаль ва унинг қизи заҳарлангани сабабли чиқариб юборганди. Ўшанда Россиянинг тўрт нафар дипломати Францияни тарк этишга мажбур бўлган, Россия ҳам худди шу тарзда жавоб қайтарганди.