Google фойдаланувчилар маълумотларини тўплагани учун йирик миқдорда жарима тўлаши мумкин

Даъвога кўра, Google Chrome браузерида ҳаттоки инкогнито режимида ҳам “хабарларни ушлаб қолиш, кузатиш ва тўплаш”да давом этиб, телефон қўнғироқларини тинглаш ва махфийлик тўғрисидаги қонунларни бузмоқда.

Chrome браузерида инкогнито режими / Фото: Getty Images

Google компанияси Chrome браузерида инкогнито режимида фойдаланувчиларни яширинча кузатганлиги учун 5 миллиард доллар миқдорида жарима тўлаши мумкин. Бу ҳақда IT Security News хабар бермоқда.

2020 йил июнда киритилган даъвога кўра, Google Chrome браузерида ҳаттоки инкогнито режимида ҳам “хабарларни ушлаб қолиш, кузатиш ва тўплаш”да давом этиб, телефон қўнғироқларини тинглаш ва махфийлик тўғрисидаги қонунларни бузмоқда.

"Суд Google фойдаланувчиларни инкогнито режимидан фойдаланаётганида маълумотлар тўплаши ҳақида огоҳлантирмаган", - дейилади Сан-Хосе округ суди ҳукмида.

Даъвогарларнинг таъкидлашларича, ушбу даъво 2016 йилдан буён интернет браузерида инкогнито режимидан фойдаланиб келаётган миллионлаб Google фойдаланувчиларига тааллуқли. Жамоавий даъвода ҳар бир фойдаланувчига 5 минг доллардан товон тўланиши талаб қилинган бўлиб, Google камида 5 миллиард доллар жаримага тортилиши мумкин.

Компания вакили Хосе Кастанеда Google даъво талаблари бўйича норозилик билдиришини айтди.

Аввалроқ Google фойдаланувчилар махфийлиги тўғрисидаги қонунни бузганлиги учун Францияда 135 миллион евро жаримага тортилганди.

#Google